بنگلورو،یکم دسمبر(ایس او نیوز/آئی این ایس انڈیا) کانگریس کے سینئر لیڈر ملکا ارجن کھرگے نے بھارتیہ جنتا پارٹی پر آئین کا غلط استعمال کرنے کا الزام لگاتے ہوئے کہا ہے کہ آئندہ ضمنی انتخابات میں کرناٹک کی عوام انہیں سبق سکھا دے گی۔کرناٹک کی 15 اسمبلی سیٹوں پر 5 دسمبر کو ضمنی انتخاب ہونے والا ہے۔بنگلور میں اتوار کو کرناٹک پردیش کانگریس کمیٹی (کے پی سی سی) کی آفس میں کھڑگے نے کہاکہ بی جے پی آئین کا غلط استعمال کر رہی ہے،عوام سب کچھ دیکھ رہی ہے کہ کس طرح سے مرکز اور ریاست میں اقتدار کا غلط استعمال کیا جا رہا ہے، بی جے پی کو سبق سکھانا ضروری ہے اور اس کے لئے ہمیں تمام 15 سیٹوں کو جیتنا ہوگا۔انہوں نے کہاکہ بی جے پی ووٹرس میں پیسے بٹوا رہی ہے، جو جمہوریت کے لئے خطرناک ہے،فی الحال بی جے پی ووٹرس پر دباؤ بھی بنا رہی ہے،اگر وہ ان طریقوں سے کامیاب نہیں ہوئے تو پھر الیکشن لڑنے کے لئے مذہبی مسائل اٹھائیں گے۔ انہوں نے جے ڈی ایس کے ساتھ اتحاد کے بارے میں پوچھے جانے پر کہا کہ کانگریس اس کے خلاف نہیں ہے۔ضمنی انتخابات کے نتائج کے بعد اس بارے میں فیصلہ کیا جائے گا۔کھڑگے نے کہاکہ بی جے پی کی مقامی قیادت نے وعدہ کیا تھا کہ اگر وہ اقتدار میں آئے تو مرکز سے فنڈ لائیں گے لیکن وہ اتنے خوفناک سیلاب کے باوجود کچھ نہیں لے کر آئے۔پی ایم مودی نے نہ تو کرناٹک کے بارے میں کچھ بولا اور نہ ہی یہاں پر آئے،میرے خیال سے پی ایم کرناٹک سے نفرت کرتے ہیں۔انہوں نے کرناٹک کی کبھی مدد بھی نہیں کی،اب اس کی وجہ یدی یورپا ہیں یا کچھ اور، اس کا ہمیں پتہ نہیں۔کرناٹک میں ہو پانچ دسمبر کو ہو رہے ضمنی انتخاب کے نتائج نو دسمبر کو آئیں گے، جن 15 علاقوں میں اسمبلی ضمنی انتخابات ہونے والے ہیں، ان میں 12 پر کانگریس اور تین پر جے ڈی ایس قابض تھے، نااہل ٹھہرائے گئے ممبران اسمبلی کی بغاوت کی وجہ سے کمارسوامی کی قیادت میں دونوں جماعتوں کی مخلوط حکومت گر گئی تھی۔کمارسوامی کی حکومت کے گرنے کے بعد اقتدار میں آئی بی جے پی کو اپنی اکثریت برقرار رکھنے کے لئے ضمنی انتخابات میں 15 میں سے کم از کم 6 سیٹیں جیتنے کی ضرورت ہے۔