مہاراشٹر: گورنر سے ملاقات کے بعد بی جے پی لیڈر کی وضاحت، قانونی پہلوؤں پر بحث، اعلیٰ قیادت جلد فیصلہ کرے گی
ممبئی،7نومبر(ایس او نیوز/آئی این ایس انڈیا) مہاراشٹر میں حکومت تشکیل کو لے کر جاری رسہ کشی کے درمیان بی جے پی لیڈروں نے گورنرہاؤس پہنچ کر گورنر بھگت سنگھ کوشیاری سے ملاقات کی۔گورنر سے ملاقات کے بعد بی جے پی لیڈروں نے دعوی کیا کہ ریاست میں اتحاد کی ہی حکومت بنے گی۔بی جے پی کے نمائندے ٹیم میں شامل ریاستی صدرچندرکانت پاٹل نے کہا کہ گورنر سے مل کر انہوں نے تمام قانونی اور سیاسی پہلوؤں پر بحث کی ہے۔انہوں نے کہا کہ پارٹی قیادت جلد مہاراشٹر میں حکومت بنانے پرفیصلہ لے گی۔بی جے پی ریاستی صدر چندرکانت پاٹل اور سینئر لیڈر سدھیر منگٹیوار کی قیادت میں نمائندہ ٹیم گورنر سے ملی۔گورنر سے ملاقات کے بعد چندرکانت پاٹل نے صحافیوں سے بات چیت میں کہاکہ ہم نے گورنر کو حکومت بنانے میں ہو رہی تاخیر کے بارے میں آگاہ کیا ہے،اب اس بارے میں اعلی قیادت آگے کی کارروائی پر فیصلہ کرے گی۔ اس سے پہلے مرکزی وزیر اور بی جے پی کے سینئر لیڈر نتن گڈکری نے بھی صاف کیا کہ صوبے میں اتحاد کی ہی حکومت بنے گی۔انہوں نے کہا کہ شیوسینا کے ساتھ بات چیت ہو رہی ہے اور جلد ہی فیصلہ ہو جائے گا۔