نئی دہلی،26؍نومبر (ایس او نیوز؍ایجنسی) یومِ آئین (26 نومبر) کے موقع پر کانگریس صدر ملکارجن کھڑگے نے جاری ایک بیان میں بی جے پی اور آر ایس ایس کو شدید تنقید کا نشانہ بنایا ہے۔ انھوں نے دعویٰ کیا ہے کہ حکومت نے آر ایس ایس کے سامنے خود سپردگی کر دی ہے جو ملک کے مضر ہے۔ انھوں نے کہا کہ ’’حکومت نے خود کو اور اداروں کو آر ایس ایس کے سامنے سرینڈر کر دیا ہے۔ یہ ایک ایسی تنظیم ہے جو کہ سماجی خدمت کی آڑ میں پروپیگنڈہ پھیلا رہی ہے۔ اب آر ایس ایس اور بی جے پی الفاظ کا یکسر استعمال کرنا غلط نہیں ہوگا۔‘‘

ملکارجن کھرگے کا کہنا ہے کہ جو آئین سات دہائیوں سے زیادہ مدت سے وقت کی کسوٹی پر کھرا اترا ہے، آج یہ ایک بنیادی بحران کا سامنا کر رہا ہے۔ اس درمیان یومِ آئین کے موقع پر انھوں نے مبارکباد پیش کرتے ہوئے کہا کہ قانون ساز اسمبلی کے سبھی عظیم لیڈروں کی بیش قیمت تعاون کو ہم یاد کرتے ہیں۔

اپنے جاری بیان میں کھرگے نے وزیر اعظم نریندر مودی کو بھی تنقید کا نشانہ بنایا۔ انھوں نے پی ایم مودی پر ’پاکھنڈ‘ کرنے کا الزام عائد کرتے ہوئے کہا کہ بی جے پی ’نظریاتی سربراہوں‘ کا آئین کی تعمیر سے کوئی لینا دینا نہیں ہے اور مودی نے 26 نومبر کو یومِ آئین کی شکل میں منانے کا فیصلہ اس لیے کیا کیونکہ وہ آئین کے تئیں احترام دکھانے کو بے قرار تھے۔

قابل ذکر ہے کہ پی ایم مودی کے ذریعہ سپریم کورٹ میں یومِ آئین تقریب کو خطاب کرنے کے کچھ گھنٹوں بعد اپوزیشن پارٹی نے ان پر تنقیدی حملے کیے۔ کانگریس جنرل سکریٹری جئے رام رمیش نے ایک ٹوئٹ میں کہا کہ ’’بی جے پی کے نظریاتی سربراہوں کا آئین کی تعمیر سے کوئی لینا دینا نہیں ہے۔‘‘ ایک دیگر ٹوئٹ میں انھوں نے کہا کہ ’’درحقیقت آر ایس ایس ہندوستانی آئین کے خلاف تھا۔ حالانکہ آئین کے تئیں احترام دکھانے کی چاہت میں پی ایم مودی نے 26 نومبر کو یومِ آئین کی شکل میں منانے کا فیصلہ کیا، بھلے ہی وہ اسے (آئین کے جذبات کو) ہر دن بگاڑتے ہیں۔‘‘