لکھنؤ،21؍مئی (ایس او نیوز؍یو این آئی)  سماج وادی پارٹی (ایس پی) سربراہ اکھلیش یادو نے الزام لگایا ہے کہ بھارتیہ جنتا پارٹی (بی جے پی) کی حکومت کورونا بحران کے اس گھڑی میں مزدوروں کو گھر پہنچنے کی بیتابی کو بھی اپنی سیاسی مفاد کے لئے استعمال کرنے میں ذرا بھی تامل سے کام نہیں لے رہی ہے۔

یادو نے بدھ کو یہاں جاری بیان میں کہا کہ ریاست میں دن رات چل رہے مزدوروں کی حالت زار کی دردناک کہانی سن کر دل دہل جاتا ہے۔ روز ہی و ہ حادثے کا شکار ہوکر جانیں گنوا رہے ہیں۔ اس سب سے بے پرواہ بی جے پی حکومت نے سبھی انسانی اقدار کو روند یا ہے۔

انہوں نے کہا کہ سمجھ میں نہیں آتا کہ جب سرکاری، پرائیویٹ اسکولوں کی پچاسوں ہزار بسیں کھڑے۔کھڑے دھول کھارہی ہیں تو ریاستی حکومت مزدوروں کو ان کے گھروں تک پہنچانے کے لئے ان بسوں کا استعمال کیوں نہیں کررہی ہے۔ حکومت کی ہٹ دھرمی بہت بھاری پڑرہی ہے۔ جومدد کو ہاتھ بڑھاتے ہیں ان کو جھٹک دینے کا غیر انسانی برتاؤبی جے پی کا عمل بن گیا ہے۔

یادو نے کہا کہ بی جے پی بہانے پر بہانے بنا کر مزدوروں کے گھر پہنچنے میں روکاوٹ بن رہی ہے۔ بھوکے۔پیاسے مزدور،خواتین، بچے بھیانک گرمی میں مشقت جھیل رہے ہیں۔ بی جے پی حکومت کی غریب اور مزدور مخالف پالیسیوں کا ہی نتیجہ ہے کہ روزانہ ہی سڑک حادثوں میں مزدوروں کی جانیں جارہی ہیں۔

انہوں نے کہا کہ اوریا میں مہلوکین کے ساتھ بی جے پی حکومت کے بے حس رویہ کو دنیا جان چکی ہے۔ اٹاوہ میں ٹرک کی زد میں آکر چھ کسانوں کی موت ہوگئی۔ کانپور میں آگرہ ۔لکھنؤ ایکسپریس وے پر پیش آئے حادثے میں مزدوروں کے بچوں کی موت ہوگئی اور 12 لوگ زخمی ہوگئے۔ اعظم گڑھ کے اترولیا میں ہائی وے پر مئو باشندہ دو طلبہ سمیت تین لوگوں کی موت ہوگئی۔ حکومت کو کوئی پرواہ نہیں ہے۔