بنگلورو،23؍مئی (ایس او نیوز) اپوزیشن لیڈر سدارامیا نے الزام لگایا ہے کہ گزشتہ سال کے ریاستی بجٹ میں بنگلورو کی ترقی کے لئے 1,500 کروڑ روپئے جاری کرنے کا اعلان کیا گیا تھا لیکن حکومت نے ایک روپیہ تک جاری نہیں کیا۔

ایک اخباری بیان جاری کرکے سدارامیا نے یہ الزام لگایا اور کہا کہ ریاستی وزیر برائے محصولات آر اشوک نے بنگلور کی ترقی کے لئے کانگریس کی جانب سے کوئی قدم نہ اٹھانے کا الزام لگایا گیا ہے لیکن انہیں معلوم ہونا چاہئے کہ کانگریس حکومت کے دوران شہر کی ترقی کیلئے 1,217کروڑ روپئے کا گرانٹ جاری کیا گیا تھا۔

انہوں نے بتایا کہ بی جے پی حکومت کی جانب سے 1500کروڑ روپے جاری کرنے کا عالان کیا گیا لیکن اب تک کوئی رقم جاری نہیں کی گئی۔ انہوں نے بتایا کہ گزشتہ مرتبہ بی بی ایم پی میں بی جے پی کا ہی میئر تھا اور ریاستی بی جے پی حکومت کے تین سال مکمل ہورہے ہیں اس کے باوجود الزام کانگریس پر لگایا جارہا ہے۔

سدارامیا نے کہا کہ وزیر اعظم نریندر مودی نے 8سال تک اقتدار کا مزہ چکھا ہے لیکن اب تک کوئی ترقیاتی کام نہیں ہوئے ہیں۔