عین انتخابات کے وقت ذات پات کی سیاست افسوس ناک: کمارسوامی
منڈیا ، 3؍ اگست (ایس او نیوز)عین انتخابات کے موقع پر چندلوگ ذات پات کی سیاست شروع کردیتے ہیں،اپنے آپ کو وکلیگا لیڈرقرار دے کر انہیں موقع فراہم کرنے کی گزارش بھی کررہے ہیں۔مگران سے میرا ایک سوال ہے کہ انہوں نے وکلیگا طبقے کیلئے کیاکیاہے؟ان کی دین وکلیگا طبقے کیلئے کیاہے؟۔یہ بات سابق وزیراعلیٰ ایچ ڈی کمارسوامی نے کہی۔
انہوں نے یہاں ناگ منگلا تعلقہ کے شری سومناہلی میں منعقدہ جے ڈی ایس کارکنوں کے اجلاس سے خطاب کرتے ہوئے کہاکہ وزیراعلیٰ بننا ان کا مقصد نہیں ہے،پارٹی اگر اقتدار پر آئی تو ضلع کے عوام کو فائدہ ہوگا۔2018کے اسمبلی انتخابات میں ضلع کے جملہ 7اسمبلی حلقوں میں بھی جے ڈی ایس کے اراکین اسمبلی منتخب ہوئے تھے،اسی وجہ سے انہیں وزیراعلیٰ بننے کا موقع ملاتھا۔2018میں انہیں وزیر اعلیٰ بنانے میں منڈیاضلع کے عوام کا کردار اہم رہاہے۔
نکھل کے انتخابات کے بارے میں کمارسوامی نے کہاکہ منڈیاکے عوام نے ہمیں انتخابات میں شکست نہیں دی ہے،بی جے پی،کانگریس اور رعیت سنگھا کے علاوہ چند میڈیاوالوں نے مل کر سازش کی اور ہمیں شکست دی، جس وقت میں نے بجٹ پیش کیاتھا،سابق وزیر اعلیٰ بی ایس ایڈی یورپانے اسے منڈیابجٹ قرار دے کر مسکرایاتھا۔بعدمیں میری طرف سے جاری کیاگیافنڈبھی واپس طلب کرلیاتھا۔ریاست میں 40فیصد کمیشن والی حکومت چل رہی ہے،پی ایس آئی گھپلے میں بڑے پیمانے پررقم لوٹی گئی۔میں نے صرف منڈیا کی حد تک انتظامیہ نہیں چلایاتھا،پوری ریاست کی ترقی کیلئے کام کیاتھا۔
کمار سوامی نے کہاکہ آئندہ ماہ پنچ رتنارتھ ابھیان شروع کیاجائے گا۔ 120 دنوں تک ریاست بھر کا دورہ کیاجائے گااور قریوں میں قیام کرکے عوام کے مسائل جاننے او ر حل کرنے کی کوشش کی جائے گی۔ سابق ریاستی وزیر بنڈپا قاسم پور نے کہاکہ وزیرا علیٰ کی کرسی کیلئے کانگریس میں ابھی سے رسہ کشی شروع ہوچکی ہے اور ایک دوسرے کے درمیان جنگ شروع ہوچکی ہے،مگر جے ڈی ایس میں ایسی کوئی الجھن نہیں ہے،ایچ ڈی کمار سوامی ہی وزیراعلیٰ کی کرسی کے دعویدار ہیں۔اپوزیشن پارٹیوں کے لیڈریہ کہہ کر اپنے آپ کو تسلی دے رہے ہیں کہ آئندہ اسمبلی انتخابات میں جے ڈی ایس پارٹی کو 10سے 15سیٹوں پر کامیابی ملے گی،مگرسچائی تو یہ ہے کہ اس مرتبہ شمالی کرناٹک میں ہی کم سے کم 30سیٹوں پر جے ڈی ایس پارٹی کامیاب رہے گی۔کسی کو بھی پریشان ہونے کی ضرورت نہیں ہے، ریاست میں جے ڈی ایس کی پوزیشن مضبوط ہے اور یہ پارٹی لیڈروں کو تیار کرنے کا کارخانہ ہے۔آئندہ اسمبلی انتخابات میں سریش گوڈاکم سے کم 70ہزار ووٹوں کی اکثریت سے کامیابی حاصل کریں گے۔
پارٹی کے ریاستی صدر سی ایم ابراہیم،رکن اسمبلی ایچ ڈی ریونا،سریش گوڈا،رویندرا شری کنٹھیا،ڈاکٹر کے انادانی،ایچ کے کمارسوامی اور دیگرموجودتھے۔