یلاپور 19/نومبر (ایس او نیوز) کانگریس پارٹی سے بغاوت کرکے نااہل قرار پانے والے سابق رکن اسمبلی شیورام ہیبارنے بی جے پی میں شمولیت اختیار کی ہے اور اب ضمنی انتخاب میں بی جے پی امیدوار کے طور پر پرچہ نامزدگی داخل کرتے ہوئے انہوں نے اپنی جائداد کا جو خلاصہ کیا ہے اس میں گزشتہ سال کے مقابلے میں 1.16کروڑ روپوں کااضافہ دکھایا گیا ہے۔

اپریل 2018میں اسمبلی انتخاب کے لئے پرچہ داخل کرتے ہوئے انہوں نے اپنی جملہ جائداد کی مالیت 6.68کروڑ روپے بتائی تھی، جبکہ اس مرتبہ انہوں نے اپنے حلف نامے میں اسے 7.84کروڑ روپے بتایا ہے۔اسی طرح ہیبار نے سابقہ الیکشن کے دوران اپنے اوپر 3.92کروڑ روپے کا قرضہ ہونے کی بات کہی تھی، اور اس مرتبہ واجب الادا قرضے میں کمی دکھاتے ہوئے کہا ہے کہ یہ رقم 1.24کروڑ روپے ہے۔

نوٹ کرنے لائق بات یہ ہے کہ شیورام ہیبار کو کانگریس پارٹی کا رکن اسمبلی رہتے ہوئے شکایت تھی کہ ان کے علاقے میں ترقیاتی کاموں کے لئے مخلوط حکومت کی طرف سے فنڈ ریلیز نہیں کیاجارہا ہے۔ انہیں وزارت سے محروم رکھا گیا ہے اور ہر طرح سے نظر انداز کیا جارہا ہے۔اس وجہ سے اپنے حلقے میں وہ بالکل غیر فعال ہوگئے تھے۔ کانگریس کے ہاتھ سے بدظن ہوکر انہوں نے بی جے پی کے کنول کو گلے لگایا ہے۔ الیکشن جیتنے اور وزارتی قلمدان پانے کے مرحلے ابھی باقی ہیں۔ اس سے پہلے ہی ایک طرف جائداد میں اضافہ اور دوسری طرف واجب الاد قرضے میں کمی سے عوام کے شکوک وشبہات کو تقویت پہنچی ہے کہ پارٹی سے بغاوت یونہی نہیں کی گئی تھی۔