لکھنؤ،20؍جون(ایس او نیوز؍ایجنسی) وزیر اعظم نریندر مودی کے قریبی مانے جانے والے قانون ساز اسمبلی کے رکن اروند کمار شرما کو آخرکاراترپردیش بی جے پی کا نائب صدر نامزد کرہی دیا گیا۔
انڈین ایڈمنسٹریٹیو سروس(آئی اے سی) سے اپنی مرضی سے سبکدوشی لینے کے بعد سیاست میں پنجہ آزمانے اترے مسٹر شرما نے بی جے پی کی رکنیت حاصل کی تھی، جس کے بعد انہیں قانون ساز اسمبلی کا رکن بنایا گیا۔ انتظامی تجربہ ہونے کی وجہ سے انہیں حکومت یا پارٹی میں اہم عہدہ دئیے جانے کے سلسلے میں چہ میگوئیاں جاری تھیں۔ آج اس پر بریک لگاتے ہوئے مؤ کے رہنے والے اے کے شرما کو ریاستی بی جے پی کا نائب صدر بنایا گیا ہے۔