یوپی: بی جے پی نے قانون ساز کونسل کے انتخابات کے لئے کیا چار امیدواروں کا اعلان
لکھنؤ،15/جنوری (آئی این ایس انڈیا) بی جے پی نے اترپردیش کی 12 قانون ساز کونسل کی نشستوں کے لئے ہونے والے دو سالہ انتخابات کے پیش نظر چار امیدواروں کے ناموں کا اعلان کیا ہے۔
پارٹی نے نائب وزیر اعلی دنیش شرما اور ریاستی بی جے پی صدر سواتنتر دیو سنگھ کو میدان میں اتارا ہے۔ اس کے علاوہ پارٹی کی سنٹرل الیکشن کمیٹی نے لکشمن پرساد اچاریہ اور گجرات کیڈر کے سابق آئی اے ایس آفیسر اروند کمار شرما کو بھی میدان میں اتارنے کا فیصلہ کیا ہے۔
واضح رہے کہ اترپردیش کی 12 قانون ساز کونسل کی نشستوں کے لئے ووٹنگ 28 جنوری کو ہونا ہے اور پرچہ نامزدگی جمع کروانے کی آخری تاریخ 18 جنوری ہے۔اسی دوران سماج وادی پارٹی نے حال ہی میں دو امیدواروں کے نام جاری کیے تھے۔
اکھلیش یادو نے قانون ساز کونسل کے انتخابات کے لئے احمد حسن اور راجندر چودھری کو میدان میں اتارا ہے۔ ایس پی نے احمد حسن کو پانچویں بار میدان میں اتارا ہے۔ سابق آئی پی ایس افسر 88 سالہ احمد حسن چار بار قانون ساز کونسل کے رکن رہ چکے ہیں۔ وہ ملائم یادو اور اکھلیش یادو حکومتوں میں بھی کابینہ وزیر رہ چکے ہیں، جبکہ راجندر چودھری اکھلیش یادو حکومت میں ایم ایل سی اور کابینہ وزیر بھی رہ چکے ہیں۔ وہ ایس پی کے بانی ممبروں میں بھی شامل رہے ہیں۔