بی جے پی اور کانگریس ریاست کے عوام کو گمراہ کرکے اقتدار حاصل کرناچاہتی ہیں:کمارسوامی
کولار، 23؍نومبر(ایس او نیوز)ریاست کرناٹک میں بی جے پی اور کانگریس دونوں پارٹیاں عوام کو گمراہ کرکے اقتدار حاصل کرناچاہتی ہیں۔یہ بات سابق وزیراعلیٰ ایچ ڈی کما ر سوامی نے کہی۔
انہوں نے یہاں ریاستی جے ڈی ایس کی طرف سے 2023کے اسمبلی انتخابات کی تیاریوں کے سلسلے میں نکالی گئی پنچ رتنایاترا کے رتھ کی کولار آمد کے دوران شہر میں منعقدہ عوامی جلسے سے خطاب کرتے ہوئے کہاکہ کانگریس پچھلے اسمبلی انتخابات کے وقت جنتا دل کو بی جے پی کی بی ٹیم قرا ر دے کر عوام کو گمراہ کیاتھا،جس کے سبب جے ڈی ایس کئی حلقوں میں کم ووٹوں کے فرق سے شکست کا منہ دیکھناپڑاتھا۔مگر بھگوان کی کرپا سے اسی کانگریس کو انتخابی نتائچ کے بعد ہمارے دروازے پرآناپڑا اور حکومت قائم کرنے کیلئے حمایت کی گزارش کرنی پڑی اور مجھے ہی وزیر اعلیٰ بنائے جانے کا آفر دیناپڑاتھا۔
انہوں نے کہاکہ ریاست کی اس وقت کی جے ڈی ایس کانگریس مخلوط حکومت کو گرانے میں یہی کانگریس لیڈر سدارامیا اور رمیش کمار کا ہاتھ رہااور بی جے پی کو ریاست میں حکومت بنانے کا موقع دیاگیا۔اب عوام کو معلوم ہوچکاہے کہ بی جے پی کی بی ٹیم کون ہیں۔ کمار سوامی نے کہاکہ سدارامیا کے دور میں کولار ضلع کی کوئی ترقی ممکن نہیں ہوسکی اور انہوں نے کولار ضلع کے عوام کیلئے کچھ نہیں کیا،مگرافسوس کہ اب یہاں سے انتخاب لڑنے کی سوچ رہے ہیں۔رمیش کمار ہمیشہ یہ کہتے آرہے ہیں کہ سدارامیا نے کولار ضلع کے عوام کیلئے پانی فراہم کیاہے،مگرسدارامیا نے جو پانی فراہم کیاہے وہ بنگلور شہر کا آلودہ،یوجی ڈی کا پانی ہے،جس سے کئی بیماریاں پھیل رہی ہیں اور تالابوں کی سیرابی کی وجہ سے زیرزمین پانی کی سطح میں ضرور اضافہ ہواہے،مگر یہ پانی زہر آلود ہے،اس کے استعمال سے انسانوں،مویشیوں اور فصلوں کو بھی نقصان پہنچ رہاہے۔یہی سدارامیا کا سب سے بڑا کارنامہ ہے ۔
کمار سوامی نے مزید کہا کہ ہر وقت فرقہ وارانہ فساد بھڑکا کر اقتدار حاصل کرنے والی بی جے پی اب حلا ل کٹ،اذان،حجاب اور دیگر معاملوں کو لے کر ہندتوا کے نام پر ووٹ حاصل کرناچاہتی ہے اور ایسے حساس معاملوں میں کوئی بھی کانگریس لیڈر نے تاحال بی جے پی کے خلاف کوئی آواز نہیں اٹھائی ہے۔ان معاملات پر مسلسل آواز اٹھاتے آرہے ہیں اور آئندہ بھی فرقہ پرستوں کے خلاف لڑتے رہیں گے۔ 2023 کے انتخابات کی تیاریاں شروع ہوچکی ہیں اور کولار کیلئے امیدوار کااعلا ن بھی ہوچکاہے،اور جے ڈی ایس امیدوار حلقے میں مقبول بھی ہوتاجارہاہے۔اس موقع پر رکن کونسل گووند راجو،کولار اسمبلی حلقے کے جے ڈی ایس امیدوارسی ایم آر سری ناتھ،ریاستی نائب صدر ضمیر احمد،سکریٹری ڈاکٹر محمد مصطفی،تعلقہ صدر راجیشوری،وکلیری رامواور دیگر موجود تھے۔