بابائے قوم کے قاتل گوڈسے کومحب وطن کہنا اس بار پرگیہ کو پڑ گیامہنگا،ڈیفنس کمیٹی سے دکھایا گیا باہر کا راستہ؛ کیا پارٹی سے بھی ہوگی باہر ؟
نئی دہلی 28/نومبر (ایس او نیوز/ایجنسی) بابائے قوم مہاتما گاندھی کے قاتل ناتھو رام گوڈسے کو لوک سبھا میںمحب وطن بتانا اس بار بی جے پی کی رکن پارلیمان پرگیہ سنگھ ٹھاکر کو مہنگا پڑ گیا، کیونکہ جمعرات کو وزارت دفاع کی کمیٹی سے اُنہیں باہر کردیا گیا ہے۔
انتہا پسندانہ بیانات دینے میں بدنام ، ہندوتوادی کا خاص چہرہ سمجھی جانے والی اور مالیگاوں بم دھماکہ کے الزام میں جیل کی ہوا کاٹ کر باہر آنے والی بھوپال سے بی جے پی کی رکن پارلیمان پرگیہ سنگھ ٹھاکر نے اس سے پہلے بھی گوڈسے کو محب وطن قرار دے چکی تھی، مگر جب پارلیمان کے اندر بھی انہوں نے بابائے قوم کے قاتل کو دیش بھکت قرار دیا تو اس پر تمام اپوزیشن پارٹیوں نے سخت اعتراض کیا تھا جس کے بعد ملک بھر میں ان کی ذہنیت کو لے کر سوالات اُٹھ کھڑے ہوگئے تھے۔
ناتھو رام گوڈسے کومحب وطن بتانے کے سلسلے میں بی جے پی کے ایگزیکٹو صدر جے پی نڈا نے کہا کہ کل پارلیمنٹ میں ان کا دیا گیا بیان قابل مذمت ہے۔ بی جے پی کبھی بھی ایسے بیان یا نظریہ کی حمایت نہیں کرتی ہے۔ انہوں نے کہا کہ ہم نے پرگیہ سنگھ ٹھاکر کو دفاعی امور کی صلاح کار کمیٹی سے ہٹا دیا ہے اور اس سیشن میں انہیں پارلیمانی پارٹی کی میٹنگوں میں حصہ لینے کی اجازت نہیں دی جائے گی۔
ذرائع سے ملی اطلاع کے مطابق پرگیہ سنگھ ٹھاکر کے خلاف پارٹی کی ڈسپلنری کمیٹی بڑی کاروائی کرسکتی کرنے کے امکانات ہیں، بتایا جارہا ہے کہ اُنہیں پارٹی سے بھی باہر کیا جاسکتا ہے۔
خیال رہے کہ مدھیہ پردیش کے بھوپال سے بی جے پی رکن پارلیمنٹ پرگیہ سنگھ ٹھاکر کو دفاعی امور کی پارلیمانی کمیٹی کیلئے نامزد کیا گیا تھا۔ اس کمیٹی کی قیادت وزیر دفاع راجناتھ سنگھ کر رہے ہیں۔