بھٹکل تعلقہ کے مرڈیشور میں کار کی ٹکر سے اسکوٹر سوار ہلاک
بھٹکل 18/مئی (ایس او نیوز) تعلقہ کے مرڈیشور کے قریب بائیلور نیشنل ہائی وے 66 پر کار اور ہونڈا ایکٹیوا کے درمیان ہوئی ٹکر میں ایکٹیوا کی پچھلی سیٹ پر سوار نوجوان اسپتال لے جانے تک دم توڑ دیا۔ حادثہ سنیچر شام کو پیش آیا۔
مرنے والے کی شناخت بینگرے کے رہنے والے منجوناتھ دیواڑیگا (16) کی حیثیت سے کی گئی ہے۔ منجوناتھ کے تعلق سے بتایا گیا ہے کہ وہ وشوا بھارتی ہائی اسکول سے تعلیم حاصل کرتے ہوئے حال ہی میں آئے میٹرک کے نتائج میں 85 فیصد مارکس کے ساتھ امتیازی نمبرات سے کامیاب ہوا تھا۔ حادثے میں اسکوٹر ڈرائیونگ کرنے والا نوجوان ونائک بیرا دیواڑیگا (24) شدید زخمی ہوا ہے اور اسے بھٹکل سرکاری اسپتال میں ابتدائی طبی امداد کے بعد اُڈپی لے جایا گیا ہے۔
بتایا گیا ہے کہ مہلوک منجوناتھ اسکول میں چھٹی ہونے پر شامیانہ کا کام کرتا تھا، سنیچر شام کو اسی سلسلے میں ونائک کے ساتھ اسکوٹر کی پچھلی سیٹ پر سوار مرڈیشور سے بائیلور جارہا تھا کہ ہوناور سے مرڈیشور کی طرف آنے والی ایک تیز رفتار کار کے ساتھ ان کی اسکوٹی کی ٹکر ہوگئی۔ حادثے میں شدید طور پر زخمی دونوں نوجوانوں کو فوری بھٹکل سرکاری اسپتال لے جایا گیا، مگر اسپتال پہنچنے تک منجوناتھ نے دم توڑ دیا۔
حادثے کی اطلاع ملتے ہی سینکڑوں لوگ بھٹکل سرکاری اسپتال پہنچ گئے اور واقعے پر سخت افسوس کا اظہار کیا۔
بھٹکل سرکل پولس انسپکٹر جی ایل گنیش سمیت دیگر پولس اہلکار بھی جائے وقوع پر پہنچ کر جائزہ لیا۔ بعد میں پوسٹ مارٹم کے بعد نعش کو گھروالوں کے حوالے کیا گیا۔
