بھٹکل میں طوفانی ہوائیں؛ چھتری کے ساتھ بائک پر بیٹھنا پڑگیا مہنگا؛ جواں سال عورت بائک سے گر کر ہلاک
بھٹکل 8/جولائی (ایس او نیوز) طوفانی ہواوں کے چلتے چھتری کھول کر بائک پر بیٹھنا ایک جواں سال عورت کو مہنگا پڑ گیا اور اُسے اپنی جان سے ہی ہاتھ دھونا پڑا۔ حادثہ بھٹکل تعلقہ کے ماروکیری اسکول کے سامنے آج پیر کو پیش آیا۔
بھٹکل میں آج صبح سے طوفانی ہواوں کے ساتھ رُک رک کر بارش کا سلسلہ جاری ہے، اس درمیان ہاڈیمّا بنت تمپاگونڈا عرف ہیما (28) ماروکیری میں واقع اپنی پھوپھی کے گھر سے اپنے پھوپھا کے ساتھ واپس اپنے گھر جالی لوٹ رہی تھی ۔ بتایا گیاہے کہ بارش کی وجہ سے اس نے اپنی چھتری ہاتھ میں تھامے بائک پر ایک سائیڈ ہوکر بیٹھی تھی کہ اچانک طوفانی ہوا ئیں چلی اور اس کی چھتری ہوا میں پھڑ پھڑانے لگی، ہیما اگر چھتری کو چھوڑ دیتی تو شائد حادثہ سے بچ سکتی تھی مگر چونکہ اس نے مضبوطی کےساتھ چھتری کو پکڑ رکھا تھا، چلتی بائک پر سے اس کا توازن بگڑ گیا اور وہ بائک سے ہی نیچے گرپڑی۔
نیچے گرتے ہی اس کے سر کا پچھلا حصہ سڑک سے ٹکرا گیا اور وہ شدید زخمی ہوگئی، اسے فوری طور پر بھٹکل سرکاری اسپتال منتقل کیا گیا، مگر وہ کچھ ہی دیر بعد زخموں کی تاب نہ لاکر چل بسی۔
ہاڈیما عرف ہیما پچھلے ڈھائی سال سے بھٹکل کی معروف سٹی میڈیکل فارمیسی میں ملازمت کرتی تھی۔ اس کو دو بھائی اور ایک بہن ہے، اس کے والد اور والدہ بھی اس حادثے کے بعد سخت صدمے میں ہیں۔
ہیما کے ساتھ پیش آئے حادثے کی اطلاع پھیلتے ہی کافی لوگ بھٹکل سرکاری اسپتال جمع ہوگئے۔ بھٹکل کے سماجی کارکن اور سٹی میڈیکل کے مالک جناب اقبال صاحب بھی واقعے کی اطلاع ملتے ہی اسپتال پہنچے اور گھروالوں کے ساتھ تعزیت کی۔
پوسٹ مارٹم کے بعد نعش کو گھروالوں کے حوالے کیا جائے گا۔
