پٹنہ،2؍مئی(ایس او نیوز؍یو این آئی) بہار میں کورونا انفیکشن سے چوتھے مریض کی آج دارالحکومت پٹنہ کے نالندا یونیورسٹی اسپتال (این ایم سی ایچ) میں موت ہوگئی۔ محکمہ صحت کے پرنسپل سکریٹری سنجے کمار نے یہاں بتایا کہ سیتامڑھی کے رہنے والے 45 سالہ ایک کورونا متاثر شخص کی این ایم سی اسپتال میں علاج کے دوران موت ہوگئی۔انہوں نے بتایا کہ وہ لمبے وقت سے پھیپھڑوں کے کینسرمیں مبتلا تھے۔

سنجے کمار نے بتایا کہ کینسر متاثر مریض 28 اپریل کو ممبئی کے ٹاٹا میموریل اسپتال سے سیتامڑھی پہنچا تھا۔ طبیعت زیادہ بگڑنے پر اسے 30 اپریل کو این ایم سی ایچ میں داخل کرایا گیا تھا۔ انہوں نے بتایا کہ اس کے نمونوں کی جانچ کے دوران اسے کورونا سے بھی متاثر پایا گیا تھا۔ علاج کے دوران حرکت قلب رکنے سے آج اس کی موت ہوگئی۔

پرنسپل سکریٹری نے بتایا کہ اس سے پہلے جمعہ کو مشرقی چمپارن کے بنجاریا کے رہنے والے ایک 54 سالہ شخص کے کورونا سے متاثر ہونے کے بعد ایم ایم سی ایچ میں علاج کے دوران موت ہوگئی تھی۔ انہوں نے بتایا کہ وہ پچھلے ایک سال سے منہ اور گلے کے کینسر میں مبتلا تھا۔ مریض 20 اپریل کو ٹی ایم ایچ، ممبئی سے بنجاریا لوٹا تھا۔ اس کے بعد 27 اپریل کو انہیں این ایم سی ایچ میں داخل کرایا گیا تھا۔ علاج کے دوران حرکت قلب رکنے سے اس کی موت ہوگئی۔ انہوں نے بتایا کہ اب سیمپل ٹیسٹ رپورٹ میں انہیں کورونا وائرس سے متاثر پایا گیا تھا۔

سنجے کمار نے بتایا کہ بہار میں اس طرح کورونا انفیکشن سے اب تک کُل چار لوگوں کی موت ہوچکی ہے۔ریاست میں پہلے متاثرہ مریض منگیر ضلع کے چورمبا کے رہنے والے سیف علی (38سال) کی 21مارچ کو پٹنہ کے ایمس میں موت ہوگئی تھی۔ وہ خلیجی ملک قطر سے ہندوستان آیا تھا اور گردے کی بیماری سے متاثر تھا۔

اس کے بعد 17 اپریل کو ریاست میں دوسرے پازیٹو مریض کی بھی پٹنہ ایمس میں موت ہوگئی۔ وہ ویشالی ضلع کا رہنے والا تھا۔ 35سالہ اس شخص کے 15 اپریل کی دیر شام آئی رپورٹ میں کورونا وائرس سے متاثر ہونے کی تصدیق ہوئی تھی۔ ایمس نے اس کی موت کی وجہ کورونا پازیٹو اور ملٹی آرگن فیلر بتائی ہے۔

مریض کو انسیفلائٹس کے ساتھ ملٹیپل انفیکشن بھی تھے۔ وہ پہلے سے ٹی بی میں بھی مبتلا رہا تھا۔ اس طرح بہار میں کورونا انفیکشن سے جان گنوانے والے چاروں مریض پہلے سے ہی کسی نہ کسی خطرناک مرض میں مبتلا تھے۔

کورونا کے 9 نئے معاملات، متاثرین کی تعداد 475 ہوئی: بہار کے بھوجپور ضلع میں چھ، کیمور میں دو اور بکسر میں ایک مریض کے کورونا متاثر ہونے کی تصدیق ہونے کے بعد آج ریاست میں متاثرین کی مجموعی تعداد بڑھ کر 475 ہوگئی۔

محکمہ صحت کے پرنسپل سکریٹری سنجے کمار نے یہاں بتایا کہ آج دوپہر آئی سیمپل جانچ رپورٹ میں بکسر ضلع میں چار خواتین اور دو مردوں کے انفیکشن کی زد میں آنے کی تصدیق ہوئی ہے۔ انہوں نے بتایا کہ ضلع کے آرا میں 43 اور 45 برس کی دو، ہنومان ٹولہ میں 32 برس کی ایک اور سکڈی میں 35 برس کی ایک خاتون اور بہیا میں ایک برس کا بچہ اور جگدیش پور میں 33 برس کا ایک نوجوان پازیٹو آیا ہے۔

کمار نے بتایا کہ کیمور ضلع کے پولیس لائن میں 25 برس کی ایک خاتون، پچاس برس کے ایک اور بکسر کے نیابھوجپور میں 13برس کا ایک بچہ اس وائرس کا شکار ہوئے ہیں۔ انہوں نے بتایا کہ تمام مریض ماضی میں متاثرہوئے لوگوں کے رابطہ میں آنے سے پازیٹو ہوئے ہیں۔ ان کے بارے میں تمام ضروری معلومات حاصل کی جا رہی ہیں۔