پٹنہ،6؍اگست (ایس او نیوز؍ایجنسی) بہار کے وزیر اعلیٰ نتیش کمار نے گزشتہ دنوں کہا تھا کہ وہ ذات پر مبنی مردم شماری کے تعلق سے وزیر اعظم نریندر مودی کو خط لکھیں گے، اور اب ایسی خبریں سامنے آ رہی ہیں کہ انھوں نے نریندر مودی کو خط لکھ کر ملاقات کے لیے وقت مانگا ہے۔ ملاقات کر کے وہ وزیر اعظم کو ذات پر مبنی مردم شماری کے تعلق سے تفصیل بتانا چاہتے ہیں اور اس سے پہنچنے والے فائدے سے بھی روشناس کرنا چاہتے ہیں۔

دراصل وزیر اعلیٰ نتیش کمار نے جمعرات کے روز نالندہ، گیا، جہان آباد اور پٹنہ ضلع کے سیلاب متاثرہ علاقوں کا ہوائی سروے کیا۔ اس سروے سے لوٹنے کے بعد انھوں نے صحافیوں سے گفتگو کرتے ہوئے وزیر اعظم کو لکھے گئے خط کے بارے میں بتایا۔ جب ان سے سوال کیا گیا کہ کیا انھوں نے وزیر اعظم سے ذات پر مبنی مردم شماری کے بارے میں بات کی، تو انھوں نے کہا کہ ’’ملاقات کے لیے وقت مانگنے سے متعلق میں نے وزیر اعظم نریندر مودی کو خط لکھ دیا ہے۔ اب جیسے ہی وقت ملے گا میں اس ایشو پر بات چیت کرنے کے لیے ان سے ملاقات کروں گا۔‘‘

اس دوران نامہ نگاروں نے نتیش کمار سے آر جے ڈی سپریمو لالو یادو کے دوبارہ سیاست میں سرگرم ہونے سے متعلق بھی سوال کیا۔ اس پر نتیش کمار نے کہا کہ سیاست کرنے کا حق سبھی کو ہے، انھیں جو کرنا ہے وہ کریں۔ واضح رہے کہ لالو پرساد نے گزشتہ دنوں شرد یادو اور اکھلیش یادو جیسے سرکردہ لیڈروں سے ملاقات کی ہے اور چراغ پاسوان کے تعلق سے بھی مثبت بیانات انھوں نے دیے ہیں۔ لالو پرساد کی اس سرگرمی نے آر جے ڈی میں ایک نئی توانائی پیدا کر دی ہے۔