بہار میں ایمبولینس حادثے کا شکار، ایک ہی کنبے کے چار افراد ہلاک
بہار شریف،07/ستمبر(ایس او نیوز/آئی این ایس انڈیا) بہار کے نالندہ ضلع میں پیر کی صبح ایک ایمبولینس سڑک پر کھڑے ٹرک سے ٹکرا گئی اور اس حادثے میں ایک ہی خاندان کے چار افراد ہلاک اور تین دیگر زخمی ہوگئے۔
اسٹیشن انچارج پنکج کمار سنگھ نے بتایا کہ یہ واقعہ چاندی پولیس تھانہ علاقہ کے گورا پار علاقے میں پیش آیا۔ایمبولینس کے ڈرائیور نے گاڑی کا کنٹرول کھو دیا، جس کے بعد وہ سڑک کے کنارے کھڑے ٹرک سے ٹکرا گئی۔
انہوں نے بتایا کہ اس واقعے میں چار افراد موقع پر ہی دم توڑ گئے، جبکہ کنبہ کے تین دیگر افراد کو چاندی پرائمری ہیلتھ سنٹر میں داخل کرایا گیا ہے۔ انہوں نے کہا کہ ان سب کی حالت مستحکم بتائی گئی ہے۔یہ سب بہار شریف تھانہ علاقہ کے چین پور گاؤں کے رہائشی ہیں۔
افسر نے بتایا کہ وہ بہتر علاج کے لئے اپنے کنبہ کے ایک شخص کو پٹنہ لے جارہے تھے، جس کو اتوار کے روز چھت سے گرنے کے بعد سر میں شدید چوٹیں آئیں۔ انہوں نے بتایا کہ ایک زخمی نے دعوی کیا ہے کہ ڈرائیور نشے میں تھا۔ وہ حادثے کے بعد فرار ہوگیا۔ اس کی تلاش جاری ہے۔