منگلورو :27؍اپریل(ایس اؤ نیوز)دکشن کنڑا ضلع کے ضلعی وینلاک اسپتال اور تعلقہ سرکاری اسپتالوں میں آکسیجن پلانٹ قیام کئے جانے کے متعلق دکشن کنڑا ضلع ڈپٹی کمشنر ڈاکٹر راجیندر کے وی نے جانکاری دی ۔ وہ یہاں سرکاری اور پرائیویٹ اسپتالوں میں آکسیجن کی قلت اور بروقت آکسیجن دستیاب نہیں ہونے کے متعلق جائزہ لینے دکشن کنڑا ضلع دفتر میں منعقدہ دمیٹنگ میں بات کررہے تھے۔
میٹنگ میں اس بات پر خاص توجہ دی گئی کہ ضلع کے کسی بھی اسپتال میں آکسیجن کی قلت نہ ہو۔ اور اگر کہیں کسی اسپتال میں کمی ہوجاتی ہے تو فوری طورپر کیسے فراہم کی جائے۔ میٹنگ کے دوران میں ڈی سی نے بتایا کہ وینلاک اسپتال میں بہت بڑے پیمانے پر آکسیجن پیدا کرنے کےلئے نیا آکسیجن پلانٹ تعمیر کیاجائے گا۔ اگلے 50دنوں میں یہ پلانٹ تعمیر ہوجائے گا۔ اب تک ای ایس آئی اور بنٹوال کے تعلقہ اسپتال میں ایم سی ایف کی جانب سے سی ایس آر منصوبےکےتحت آکسیجن پلانٹ تعمیر کرنے کا فیصلہ لیاگیا ہے۔ ایم آر پی ایل کے ذریعے اور ایک آکسیجن پلانٹ کی تعمیر کا منصوبہ تیار کئے جانےکے متعلق ڈی سی نے جانکاری دی ۔ میٹنگ میں رکن اسمبلی وید ویاس کامت ، آکسیجن سپلائر ، آئی ایم اے کے ڈاکٹروں کی ٹیم اور افسران وغیرہ موجود تھے۔