کرولی، 18/مارچ (ایس او نیوز/ایجنسی) راجستھان کے کرولی میں چنبل ندی پار کرنے کے دوران 17 عقیدتمند ڈوب گئے۔ جس میں سے 9 کو بچالیا ہے، دو لوگوں کی لاشیں اب تک برآمد ہو چکی ہیں جبکہ چھ عقیدتمند اب بھی لاپتہ بتائے جا رہے ہیں۔

بتایا جا رہا ہے کہ عقیدتمند مدھیہ پردیش سے کیلا دیوی کا دَرشن کرنے جا رہے تھے۔ غوطہ خوروں اور ایس ڈی آر ایف کی مدد سے ریسکیو آپریشن چل رہا ہے۔

معاملہ کرولی ضلع کے منڈرائل تھانہ علاقہ واقع رودھئی گھاٹ کا ہے۔ بتایا گیا ہے کہ ندی سے زندہ نکالے گئے کچھ لوگوں کی حالت خراب ہے، لیکن وہ خطرے سے باہر ہیں۔

میڈیا رپورٹ کے مطابق چنبل ندی میں پانی بہت زیادہ تھا۔ جب عقیدتمند ندی کو پار کر رہے تھے تو کچھ لوگ پانی میں بہنے لگے۔ سبھی عقیدتمند ایک دوسرے کو بچانے کی کوشش کرنے لگے اور پھر بہتے ہی چلے گئے۔ جب ان لوگوں کا شور مقامی لوگوں نے سنا تو بھاگتے ہوئے پہنچے اور کافی مشقت کے بعد کچھ لوگوں کو زندہ بچا لیا۔ باقی لوگوں کی تلاش اب بھی جاری ہے۔

اس واقعہ کی خبر ملتے ہی کرولی ضلع کلکٹر انکت کمار سنگھ، ضلع پولیس سپرنٹنڈنٹ اور دیگر افسران جائے حادثہ پر پہنچ گئے۔ انتظامیہ نے راحت و بچاؤ کا کام شروع کر دیا ہے۔ لوگوں کا کہنا ہے کہ جہاں پر یہ حادثہ پیش آیا وہ دور کا علاقہ ہے اس وجہ سے مسافروں کو وقت پر بچانے میں پریشانی ہوئی۔ بہرحال، ایس ڈی آر ایف کی ٹیم بھی جائے حادثہ کے لیے روانہ ہو چکی ہے۔

واضح رہے کہ 19 مارچ سے کیلا دیوی کا میلہ شروع ہو رہا ہے۔ اس کے لیے پیدل مسافر گزشتہ ایک ہفتے سے کیلا دیوی کے دَرشن کے لیے پہنچ رہے ہیں۔ مدھیہ پردیش سے بڑی تعداد میں عقیدتمند اس میلہ میں پہنچتے ہیں۔