نومنتخب امریکی صدر جو بائیڈن کی معاشی ٹیم کا اعلان

Source: S.O. News Service | Published on 1st December 2020, 8:21 PM | عالمی خبریں |

نیویارک، یکم دسمبر (آئی این ایس انڈیا)امریکہ میں انتقالِ اقتدار سے قبل نومنتخب صدر جو بائیڈن کی جانب سے اپنی آئندہ حکومت کے ذمے داران کا اعلان جاری ہے اور اب انہوں نے اپنی معاشی ٹیم کا بھی اعلان کر دیا ہے۔

امریکہ میں انتقالِ اقتدار کے متعلقہ محکمے نے گزشتہ ہفتے ہی بائیڈن کی باضابطہ طور پر کامیابی تسلیم کی تھی جس کے بعد باقاعدہ طور پر انتقالِ اقتدار کا عمل شروع کر دیا گیا تھا۔

جو بائیڈن 20 جنوری کو اپنے عہدے کا حلف اٹھائیں گے۔

پیر کو بائیڈن نے اپنی کابینہ میں وزیرِ خزانہ کے لیے امریکہ کے مرکزی بینک 'فیڈرل ریزرو' کی سابق سربراہ جینٹ ییلن کے نام کا اعلان کیا۔

امریکی محکمۂ خزانہ کی 231 سالہ تاریخ میں پہلا موقع ہو گا جب ایک خاتون اس محکمے کی سربراہی کریں گی۔

بائیڈن نے انتظامی اور بجٹ کے امور سے متعلق دفتر کی ڈائریکٹر کے لیے نیرا ٹنڈن کا انتخاب کیا ہے۔ سینیٹ سے اُن کی منظوری کی صورت میں ٹنڈن پہلی ایشیائی امریکی خاتون ہوں گی جو اس دفتر کی سربراہی کریں گی۔

ٹنڈن اس وقت 'سینٹر فار امریکن پروگریس' نامی ادارے کی صدر ہیں۔

نومنتخب صدر نے ویلی ایڈیومو کو وزیرِ خزانہ ییلن کا نائب مقرر کیا ہے۔ وہ پہلی افریقن امریکن ہیں جو محکمۂ خزانہ میں دوسری اہم ترین ذمہ داری سنبھالیں گی۔

جو بائیڈن نے لیبر اکانومسٹ سیسیلیا روز کو وائٹ ہاؤس کی 'کونسل آف اکنامک ایڈوائزرز' کی سربراہ نامزد کیا ہے۔ وہ پہلی سیاہ فام خاتون ہوں گی جو یہ عہدہ سنبھالیں گی۔

بائیڈن نے ماہرینِ معیشت جیرڈ برسٹین اور ہیتھر بوشی کو اکنامک کونسل کا رکن مقرر کیا ہے۔

جو بائیڈن نے اپنے ایک بیان میں کہا ہے کہ ہمیں کرونا وائرس پر قابو پانا ہے جس کے لیے مذکورہ ٹیم فوری طور پر امریکی عوام کو معاشی بحران سے نکالنے کے لیے کام کرے گی اور معیشت کو پہلے سے بہتر ٹریک پر چلائے گی۔

یاد رہے کہ تین نومبر کو صدارتی انتخاب کے بعد بائیڈن نے کرونا وائرس پر قابو پانے اور معیشت کی بحالی کو اپنی اولین ترجیح قرار دیا تھا۔

عالمی وبا سے امریکہ کی معیشت کو شدید نقصان پہنچا ہے جب کہ دو کروڑ سے زائد افراد بے روزگار ہوئے ہیں۔

بائیڈن کی کابینہ

جو بائیڈن اب تک اپنی کابینہ کے بعض ارکان نامزد کر چکے ہیں جب کہ دیگر کئی عہدوں پر نامزدگیاں ابھی باقی ہیں۔

اینٹنی بلنکن کو بائیڈن نے امریکہ کا آئندہ وزیرِ خارجہ نامزد کیا ہے جو نومنتخب صدر کے معتمدِ خاص تصور کیے جاتے ہیں۔

بلنکن اس سے قبل بھی خارجہ امور سے متعلق مختلف ذمہ داریاں انجام دے چکے ہیں۔ وہ سابق صدر بل کلنٹن کے دور میں قومی سلامتی کونسل کے رُکن جب کہ اوباما دور میں قومی سلامتی کے نائب مشیر رہ چکے ہیں۔ جب جو بائیڈن سینیٹ کی خارجہ اُمور کمیٹی کے چیئرمین تھے تو اُس وقت بلنکن کمیٹی کے اسٹاف ڈائریکٹر تھے۔

بائیڈن آلے ہاندرو مایورکس کو داخلی سلامتی کا وزیر نامزد کر چکے ہیں۔ وہ یہ عہدہ سنبھالنے والے پہلے لاطینی نژاد تارکِ وطن ہوں گے۔

اسی طرح نومنتخب صدر نے ایورل ہینز کو ڈائریکٹر آف نیشنل انٹیلی جنس اور جیک سولیون کو مشیر برائے قومی سلامتی نامزد کیا ہے۔

جو بائیڈن کی کمیونی کیشن ٹیم

نومنتخب صدر جو بائیڈن اور نائب صدر کاملا ہیرس نے اتوار کو اپنی کمیونی کیشن ٹیم کا اعلان کیا تھا۔ اُن کی اس ٹیم میں تمام اہم عہدوں پر خواتین کو نامزد کیا گیا ہے۔

وائٹ ہاؤس کے کمیونی کیشن ڈائریکٹر کے لیے کیٹ بیڈنگفیلڈ جب کہ ہلی ٹوبر کو کیٹ کا نائب مقرر کیا گیا ہے۔

ہاؤس اسپیکر نینسی پیلوسی کی کمیونی کیشن ڈائریکٹر ایشلے ایٹنی کو کاملا ہیرس کی کمیونی کیشن ڈائریکٹر ہوں گی۔

سیمون سینڈرز نائب صدر کاملا ہیرس کی سینئر مشیر اور مرکزی ترجمان کی حیثیت سے کام کریں گی۔

جین ساکی کا انتخاب وائٹ ہاؤس کی پریس سیکریٹری کے لیے کیا گیا ہے۔ سیاسی تجزیہ کار کیرن جین پیری بطور نائب جین ساکی کے ساتھ کام کریں گی۔

ایک نظر اس پر بھی

ماسکو کنسرٹ ہال حملے میں 143ہلاکتیں

روس کے دارالحکومت ماسکو میں ایک کنسرٹ ہال پر جمعہ کو ہونے والے حملے میں مرنے والوں کی تعداد بڑھ کر 143 ہوگئی ہے جبکہ 100 سے زائد افراد زخمی ہیں۔روس کی تحقیقاتی کمیٹی نے ہفتے کے روز یہ اطلاع دی۔ کمیٹی نے کہا کہ ایمرجنسی سروسز ماسکو اوبلاست میں کروکس سٹی ہال، دہشت گردانہ حملے کی جگہ ...

80 ہزار افراد نے مسجد اقصیٰ میں نماز جمعہ ادا کی

قابض اسرائیلی فوجوں  کی سختی کے باوجود رواں  سال رمضان کے پہلے جمعہ کو ۸۰؍ ہزار مسلمانوں   نے بیت المقدس میں  پہنچ کر نماز جمعہ ادا کی۔ قدس نیوز نیٹورک نے جو ویڈیوشیئرکئے ہیں  میں  دیکھا جاسکتاہے کہ جوق در جوق مغربی کنارہ، راملہ اور دیگر علاقوں  سے فلسطینی شہری پیدل اور بسوں ...

شہریت ترمیمی قانون پر امریکہ نے بھی اپنی تشویش ظاہر کردی

امریکہ اور نے ہندوستان کے متنازعہ شہریت ترمیمی قانون پر عدم تحفظات کا اظہار کردیا۔ امریکی محکمہ خارجہ کے ترجمان نے بیان میں کہا کہ ہندوستان میں شہریت کے متنازعہ ترمیمی قانون کے نفاذ پر تشویش ہے۔ ایکٹ کے نافذ ہونے کے بعد صورتحال کا بغور جائزہ لے رہے ہیں۔

غزہ پر اسرائیلی حملوں کے سبب جان گنوانے والے فلسطینیوں کی تعداد 31272 ہوئی

غزہ پٹی پر جاری اسرائیلی حملوں سے فلسطینیوں کی ہلاکتوں کی تعداد 31272 ہو گئی ہے۔ غزہ میں قائم وزارت صحت نے بدھ کو یہ اطلاع دی۔ وزارت نے ایک بیان میں کہا کہ اسرائیلی فورسز نے گزشتہ 24 گھنٹوں کے دوران 88 فلسطینیوں کو قتل اور 135 دیگر کو زخمی کیا، جس سے گزشتہ اکتوبر میں اسرائیل اور حماس ...

غزہ میں امداد کیلئے قطار میں منتظر افراد کو پھر نشانہ بنایا گیا، 11 شہید

  انسانیت کی تمام حدوں  کو پار کرتے ہوئے اسرائیلی فوجوں  نے بدھ کو پھر بھکمری کے شکار ان پریشان حال لوگوں  کو نشانہ بنایا جو اپنے بچوں  کی پیٹ کی آگ بجھانے کیلئے امداد حاصل کرنے کے مقصد سے قطار میں  لگے ہوئے تھے۔ بدھ کے اس حملے میں  ۱۱؍ افراد کی شہادت کی تصدیق ہوئی ہے جس کے بعد ...

انڈونیشیا میں سیلاب اور چٹان کھسکنے سے تباہی، 19 افراد ہلاک ،متعدد زخمی

انڈونیشیا کے جزیرے سماترا میں مسلسل بارش نے سیلاب اور چٹان کھسکنے سے بڑے پیمانے پرتباہی ہوئی ہے۔ اس دوران 5سے زائد گھر دب گئے۔ مکانات کے ملبے سے12 لاشیں نکالی گئیں اور 7افراد کو شدید زخمی حالت میں اسپتال پہنچایا گیا۔ ملبے سے دیگر 6 افراد کو بحفاظت نکالا گیا جبکہ5 افراد اب تک ...