بھٹکل ،24؍ مئی (ایس او نیوز) کووڈ کے بڑھتے ہوئے معاملات اور آکسیجن کی کمی سے ہونے والی مشکلات کو دیکھتے ہوئے سابق ایم ایل اے منکال وئیدیا نے ضرورتمندوں کو گھروں تک مفت آکسیجن فراہم کرنے کا انتظام کیا ہے ۔
مرڈیشور میں مفت آکسیجن سپلائی کا سلسلہ شروع کرتے ہوئے منکال وئیدیا نے کہا کہ میسور کے چامراج نگر میں آکسیجن کی قلت سے جو سانحہ پیش آیا تھا اس طرح کا کوئی واقعہ ضلع شمالی کینرا میں پیش نہ آنے پائے اس لئے انہوں نے ستیش سائیل، بھیمنّا نائک اور شاردا شیٹی نے مل کر آکسیجن فراہمی کا منصوبہ بنایا۔ اس کے لئے سپریم کورٹ کے وکیل دیو دت کامت نے رہنمائی اور معلومات فراہم کرتے ہوئے سلینڈرس حاصل کرنے میں ہماری رہنمائی کی۔
منکال وئیدیا نے بتایا کہ ہم نے کاروار، انکولہ، کمٹہ، سرسی اور بھٹکل میں ٹیمیں تشکیل دی ہیں۔ لگتا ہے کہ ضلع میں آکسیجن کی کمی پیش نہیں آئے گی۔ لوگوں کے دلوں میں خوف و ہراس پیدا ہوگیا ہے۔ تعلقہ سرکاری اسپتالوں میں آکسیجن بیڈ خالی نہیں ہیں۔ ایسے میں غریب مریضوں کے لئے کنداپور، اڈپی شہروں میں پرائیویٹ اسپتالوں کو رخ کرنا اور وہاں علاج کروانا ممکن نہیں ہوتا۔ ان حالات کا سنجیدگی سے جائزہ لینے کے بعد ہماری ٹیم نے ہمارے کارکنان کو آکسیجن لگانے کی تربیت دی۔
انہوں نے کہا ڈاکٹروں کی طرف سے آکسیجن لگانے کی تجویز والا خط لانے پر میرے اسمبلی حلقہ کے کسی بھی علاقے میں کسی بھی ضرورت مند مریض کو آکسیجن سلینڈر اس کے گھر تک پہنچا دیا جائے گا۔ اس کے علاوہ اگر سرکاری اسپتال میں بھی آکسیجن کی کمی واقع ہوئی تو ہم لوگ جتنی چاہے اتنی آکسیجن فراہم کرنے کے لئے تیار ہیں۔
ڈاکٹروں کا تجویز کردی خط رکھنے والے ضرورت مند ان نمبروں پر رابطہ قائم کر سکتے ہیں :
9448007704, 9980007704, 9448182938, 9448965219