مسقط ، 11؍مئی (جعفر نورالدین ندوی/ ایس او نیوز) بھٹکل مسلم اسوسی ایشن مسقط کے رکن اور سیب کے معروف کاروباری عبدالواجد دامودی کی صدارت میں عمان کے سیب میں بھٹکلی کمیونٹی کے لئے پہلی بار ایک گیٹ ٹوگیدر تقریب کا انعقاد کیا گیا جس میں سیب اور اطراف میں برسرروزگار بھٹکل کے کثیر لوگوں نے شرکت کرتے ہوئے پروگرام کا بھرپور لطف اُٹھایا۔ سیب ملن 2022 کے نام سے یہ تقریب عین عید الفطر کے دن رکھی گئی تھی ۔
برکاء نامی مقام پر ایک بڑے فارم ہاوس میں منعقدہ یہ تقریب صبح 9 بجے شروع ہو کر دوسرے دن رات 3 بجے تک جاری رہی۔ تقریب کے آرگنائزر وں نے کھانے پینے کا مکمل انتظام کیا تھا جبکہ پروگرام میں مختلف کھیل اور دیگر پروگرام بھی رکھے گئے تھے۔ اِنڈور اور آؤٹ ڈور کھیلوں میں ٹگ آف وار، سیک ریس، لوگوری، کرکٹ اور ہاوئزی مقابلہ میں لوگوں نے بڑھ چڑھ کر حصہ لیا اور خوب لطف اُٹھایا۔ نمایاں کھیل پیش کرنے والے مرد، عورت اور بچوں کو انعامات سے نوازا گیا۔
دوسرے دن پروگرام میں مزاحیہ پروگرام بالخصوص نوائطی نظمیں وغیرہ پیش کی گئیں اور ریفل ڈرا ء کے ذریعے 3 اسکوٹر ، نصف گنی اور دس ہزار روپئے سمیت دیگر کئی انعامات پروگرام میں شریک لوگوں میں تقسیم کئے گئے۔
اس موقع پر کوویڈ 19 میں بہترین خدمات انجام دینے والی محترمہ ڈاکٹر وسیمہ بنت معلم ظفر علی صاحبہ کی شال پوشی کے ذریعے تہنیت کی گئی اور ان کی خدمات کو سراہا گیا۔ اسی طرح محترم میراں ائیکری صاحب کو بھی کوویڈ 19 میں بہترین خدمات کے پیشِ نظر شال پوشی کی گئی اور ان کی بھی خدمات کا اعتراف کیا گیا۔
پروگرام میں کم و بیش 300 لوگوں نے شرکت کی ۔الوداعی کلمات اور دعاؤں کے ساتھ پروگرام اختتام پذیر ہوا۔