بھٹکل کی نیو شمس اسکول کو ’رابطہ بیسٹ اسکول ‘ایوارڈ
بھٹکل:3؍اگست (ایس اؤ نیوز)تربیت ایجوکیشن سوسائٹی بھٹکل کے زیر سرپرست چلنے والی نیو شمس اسکول کو سال 2018-19کا ’’عثمان حسن جوباپو میمورئیل رابطہ بیسٹ اسکول‘‘ ایوارڈ سے نوازاگیا ہے۔
جمعہ کی شام انجمن کے اسلامیہ اینگلو اردو ہائی اسکول میدان میں منعقدہ رابطہ تعلیمی ایوارڈجلسے میں مہمان خصوصی ممبئی کے ڈاکٹر ظہیر قاضی اور دیگر معزز شخصیات نے تربیت ایجوکیشن سوسائٹی کے ذمہ داروں کو نیو شمس ہائی اسکول ’عثمان حسن جوباپو میمورئیل رولنگ شیلڈ ‘ کا ایوارڈ دیا۔
اس پرمسرت موقع پر اخبار نویسوں سے گفتگو کرتے ہوئے تربیت ایجوکیشن سوسائٹی کے صدر محمد اسماعیل محتشم نے تاثرات کا اظہار کرتےہوئے کہاکہ بھٹکل کی پریم سنیما تھیٹر کو طلبا کی زندگی تشکیل دینےو الی اسکول میں منتقل کرنے کا اعزاز تربیت ایجوکیشن سوسائٹی کے سر ہے۔ ہمارا ادارہ گزشتہ 47برسوں سے تعلیمی میدان میں سرگرم عمل ہے۔ آئی سی ایس ای نصاب کے تحت شروع کی گئی نیو شمس اسکول پچھلے تین برسوں سے مسلسل 100فی صد نتیجہ درج کرتی رہی ہے۔ یہاں کے طلبا انفرادی طورپر بھی امتیازی نمبرات سے کامیاب ہوتے رہے ہیں۔ یہاں طلبا کی ہمہ جہت ترقی پر توجہ دی جاتی ہے۔ تعلیم وتدریس کے لئے ضروری جدید سہولیات ہمارے ہاں دستیاب ہونےکی بات کہی ۔
اسکول کے صدر مدرس محمد رضامانوی نے کہاکہ ہماری اسکول کوسال 2017میں بھی بیسٹ اسکول ایوارڈ ملا تھا۔ دوسری مرتبہ بیسٹ اسکول کا اعزاز حاصل ہواہے اسی طرح دو مرتبہ ہمارے اسکول کے اساتذہ کو بیسٹ ٹیچر ایوارڈ بھی ملا ہے۔ طلبا میں مذہبی رواداری ، بھائی چارگی ، یک جہتی پر خاص توجہ دیتے ہوئے انہیں مختلف مذاہب کے طلبا کے ساتھ گفتگو، ملاقات کا موقع فراہم کرنےکی جانکاری دی۔ ایوارڈ تقریب میں ادارے کے سابق صدر عبدالقادر باشا رکن الدین، اسکول بورڈ چیرمن قادر میراں پٹیل ، تعمیراتی کمیٹی کے ناظم ایس کے صلاح الدین ، قمر سعدا ،نجیب ائیکری ،محمد یونس قاضیا ، عبدالرحیم جوکاکووغیرہ موجود تھے۔
