بھٹکل تعلقہ میں 2نئے ضلع پنچایت حلقوں کی تشکیل کا امکان : تعلقہ پنچایت حلقوں کی تعداد 12
بھٹکل :23؍ مئی (ایس اؤ نیوز) مختلف وجوہات کی بنا پر مقامی عوامی اداروں کے انتخابات کو ملتوی کرنے والی کوششوں کو سپریم کورٹ کے ذریعے قد غن لگاتےہی ریاست میں بی بی ایم پی کے ساتھ ضلع پنچایت ، تعلقہ پنچایت انتخابات کے لئے الیکشن کمیشن اور سیاسی پارٹیاں تیاریوں میں جٹ گئی ہیں۔
اس سے قبل حکومت کی جانب سے حلقوں کی تشکیل کی گئی تھی لیکن اب ان سب کو چھوڑ کر نئے سرے سے آبادی کے تناسب کے مطابق حلقوں کی دوبارہ تشکیل کرنے کی اطلاعات موصول ہوئی ہیں۔ بھٹکل تعلقہ کے 16گرام پنچایت میں 1،10،000 کی آبادی بستی ہے۔ حلقوں کی دوبارہ تشکیل کے دوران 18000کی آبادی پر مشتمل ایک ضلع پنچایت حلقہ بنایاجارہاہے جس کے مطابق بھٹکل میں 6ضلع پنچایت کے حلقے تشکیل پائیں گے۔ یعنی گذشتہ مرتبہ کے 4میں مزید 2نئے ضلع پنچایت حلقے میں شامل ہوجائیں گے۔ موصولہ اطلاعات کے مطابق ماولی اور بیلکے ضلع پنچایت کے حلقے تقسیم ہوسکتےہیں ۔ شرالی اور ہیبلے ضلع پنچایت حلقہ کے چند علاقے نئے تشکیل دئیے جانے والے حلقہ میں شامل کئے جانےکی بات کہی جارہی ہے۔
تعلقہ پنچایت حلقوں میں اضافہ :گذشتہ مرتبہ جب حلقوں کی حلقوں کی تقسیم کی گئی تھی تو بھٹکل تعلقہ پنچایت کے 12نشستوں کو کم کرتےہوئے 9کی گئی تھیں۔ اب نئے اصولوں کےمطابق قریب 9000کی آبادی پر ایک تعلقہ پنچایت کا حلقہ مقرر کیاگیا ہے تو پھر سے بھٹکل تعلقہ پنچایتوں کی تعداد12ہی رہنا یقینی کہاجارہاہے۔