بھٹکل 5/جولائی (ایس او نیوز) بھٹکل ویمن سینٹر کو کوویڈ۔19 سینٹر میں منتقل کرنے کے بعد آج اتوار کو بھٹکل سرکاری اسپتال سے تمام کورونا سے متاثرہ لوگوں کو منتقل کیا گیا۔ اس موقع پر قومی سماجی ادارہ مجلس اصلاح و تنظیم بھٹکل کی جانب سے محمد صادق مٹا موجود تھے۔ انہوں نے بتایا کہ کل سنیچر رات کو سونارکیری اسکول سےتمام 18 لوگوں کو یہاں منتقل کیا گیا تھا، مگر مزید بستر بچھانے کا کام باقی رہنے کی وجہ سے دیگر لوگوں کو شفٹ نہیں کیا گیا تھا۔
تعلقہ انتظامیہ کی جانب سے یقین دھانی کے باوجود کاروار اسپتال سے آج بستروں کو یہاں لاکر بچھانے کا کام نہیں ہوسکا، مگر چونکہ آج بھی نو لوگوں کی رپورٹ پوزیٹیو آئی تھی اور سرکاری اسپتال میں جگہ کی قلت پائی جارہی تھی، اس بنا پر آج دوپہر کو کورونا سے متاثرہ تمام لوگوں کو نئے کوویڈ سینٹر میں منتقل کیا گیا۔
صادق مٹا نے بتایا کہ شام تک 64 لوگوں کو یہاں شفٹ کیا جاچکا ہے۔ سات دیگر لوگوں کو جن میں بعض حاملہ خواتین اور عمر رسیدہ لوگ ہیں، انہیں سرکاری اسپتال میں ہی رکھا گیا ہے۔
جناب صادق صاحب نے بتایا کہ فی الحال ویمن سینٹر کے گراونڈ فلور پر ہی بستروں کو بچھایا گیا ہے، عمارت ماشاء اللہ اتنی عالیشان ہے کہ مزید سو سے زائد بستر بھی یہاں لگائے جاسکتے ہیں۔ فی الحال یہاں 92 بستروں کا انتظام کیا گیا ہے۔
یاد رہے کہ مزید سو سے زائد لوگوں کے سیمپلوں کی رپورٹ آنی باقی ہے، اگر اگلے دو ایک دنوں میں بھٹکل کے مزید لوگوں کی رپورٹ پوزیٹیو آتی ہے تو پھر یہاں بستر کم پڑسکتے ہیں۔ تعلقہ انتظامیہ کی جانب سے یہاں آج سو بیڈ لگائے جانے تھے مگر شام ہونے تک بھی کوئی بیڈ نہیں پہنچ سکے تھے۔
ویمن سینٹر میں بچوں کو کھیلنے کے لئے خوبصورت پارک بھی ہے اور لوگوں کو عمارت سے باہر ٹہلنے کے لئے بھی کافی وسیع جگہ ہے۔
عمارت کے کمپاونڈ کے باہر کسی بھی شخص کو نکلنے کی اجازت نہیں ہے اور باہر پولس کا پہرہ بٹھایا گیا ہے۔