بھٹکل یکم / اگست (ایس او نیوز) ایڈیشنل ڈسٹرکٹ اور سیشنس کورٹ کاروارنے چوتنی کی  ایک پندرہ سالہ نابالغ لڑکی کو اغوا کرنے اور پھر مرڈیشور کی ایک لاڈج میں اس کے ساتھ جنسی ہراسانی کرنے کے بعداس معاملے کو پوشیدہ نہ رکھنے کی صورت میں جان سے مارنے کی دھمکی دینے کے الزام میں بھٹکل گلمی   کے الطاف نامی نوجوان کو 12سال قید اور 10ہزار روپے جرمانے کی سزا سنائی ہے۔

 پولیس کے ذریعے عدالت میں داخل کی گئی چارج شیٹ کے مطابق پوکسو قانون کے تحت سزا پانے والا الطاف پیشے سے ایک  ڈرائیور ہے۔ اس نے2/ مارچ 2017کو اپنے دوست کی کار میں نابالغ لڑکی کو اس کے گھر سے اغوا کیا اور افسر گونڈا نامی پکنک اسپاٹ پر لے گیا۔ وہاں سے مرڈیشور کی ایک لاڈج میں لے جاکردوسرے دن صبح تک کمرے میں بند رکھا اورشادی کا وعدہ کرتے ہوئے لڑکی کے ساتھ جنسی ہراسانی کی۔ پھر اس کو دھمکی دی کہ اگر یہ بات اس نے کسی کو بتائی تو وہ جان سے مار ڈالے گا۔

 اس ضمن میں جب بھٹکل ٹاؤن پولیس اسٹیشن میں معاملہ درج کیا گیا تو پولیس نے کار کو ضبط کرنے کے ساتھ ملزم الطاف کوبھی گرفتار کرلیاتھا۔ اُس وقت  کے سب انسپکٹر گنیش کے ایل نے تحقیقات کے بعد چارج شیٹ داخل کی تھی۔ عدالت میں معاملے کی سماعت کے بعد جرم ثابت ہونے پر ایڈیشنل ڈسٹرکٹ اور سیشنس جج شیواجی اننت نیلوڈے نے سزا کا فیصلہ سنایا۔ عدالت نے ڈسٹرکٹ لیگل ایڈ اتھاریٹی کو ہدایت دی ہے کہ ہ متاثرہ لڑکی کو مناسب معاوضہ اد ا کرے۔سرکار کی طرف سے اس معاملے کی پیروی اسپیشل پبلک پراسکیوٹر سبھاش پی کیرنّا نے کی۔