بھٹکل :15؍ نومبر(ایس اؤ نیوز)اترکنڑا ڈسٹرکٹ ڈیف اسوسی ایشن کے زیر اہتمام 18تا 20نومبر 2022کو بھٹکل میں 8ویں کرناٹکا اسٹیٹ ٹی 20ٹنیس بال کرکٹ ٹورنامنٹ ( مرد و خواتین ) کا شاندار انعقاد کیا گیا ہے جس میں ریاست کے مختلف اضلاع سے ڈیف کھلاڑیوں پر مشتمل ٹیمیں حصہ لیں گی۔ اس بات کی جانکاری بھٹکل کے ڈیف ذمہ داران نے پریس کانفرنس کے ذریعے دی۔
پریس کانفرنس میں ڈیف اسوسی ایشن کے ذمہ داران نے بتایا کہ کرناٹکا اسپورٹس فیڈریشن آف ڈیف بنگلورو کی رہنمائی میں ٹنیس بال کرکٹ ٹورنامنٹ منعقد کیاجارہاہے تاکہ ہمارے جیسے ڈیف نوجوان اپنی صلاحیتوں کا مظاہر ہ کرسکیں ۔ یہ ٹورنامنٹ مردوں اور عورتوں کے لئے الگ الگ ہوگا۔ مردوں کے لئے پہلا انعام 25000روپئے اور دوسرا انعام 15000روپئے تو ٹورنامنٹ جیتنے والی خاتون ٹیم کو پہلا انعام 8000روپئے اور دوسراانعام 5000روپئے دیاجائے گا۔ اس کے علاوہ انفرادی طورپر مین آف دی میچ، وومن آف دی میچ اور فائنل کے بعد بیسٹ بیٹسمن ، بیسٹ باولر اور بیسٹ آل راؤنڈر کےانعام بھی دئیے جائیں گے۔ کرناٹک بھر سے کرکٹ کی ٹیمیں ٹورنامنٹ میں شریک ہونگی۔ ٹورنامنٹ میں کل 32میچس کھیلے جائیں گے جو 2میدانوں میں ہونگے۔
ٹورنامنٹ کی افتتاحی تقریب 18نومبر 2022کی صبح 10بجے انجمن گراؤنڈ ، انجمن آباد میں منعقد ہوگی ۔ ریاستی وزیر برائے مزدور شیورام ہیبار ٹورنامنٹ کا افتتاح کریں گے، اسسٹنٹ کمشنر ممتا دیوی اور رکن اسمبلی سنیل نائک مہمان خصوصی ہونگے۔ اسی طرح انعامی تقریب 20نومبر 2022کی شام 5بجے تعلقہ اسٹیڈیم (وائی ایم ایس اے گراونڈ)میں منعقد ہوگی ۔سابق رکن اسمبلی منکال وئیدیا صدارت کریں گے تو رکن اسمبلی سنیل نائک چراغ جلا کر پروگرام کا افتتاح کریں گے۔ اس تقریب میں مجلس اصلاح وتنظیم بھٹکل کے صدر عنایت اللہ شاہ بندری مہمان خصوصی کے طور پر شریک ہونگے۔
پریس کانفرنس میں اسوسی ایشن کے سرپرست عبدالسلام شاہ بندری ، صدر ہونیا موگیر ، سکریٹری یوسف موٹیا، یشونت نائک، ثوبان آرمار اور سعادت حسین کولا موجود تھے۔