بھٹکل :20؍ نومبر(ایس اؤ نیوز)اترکنڑا ڈسٹرکٹ دیف اسو سی ایشن کے زیر اہتمام منعقدہ تین روزہ 18تا20نومبر ریاستی سطح کے 8ویں ڈیف ٹی 20ٹنیس بال کرکٹ ٹورنامنٹ میں مردوں کے زمرے میں میزبان اترکنڑا ڈیف کرکٹ ٹیم اور خواتین کے زمرےمیں بنگلورو کی ڈیف کرکٹ ٹیم نے بازی مارتے ہوئے شاندار کرکٹ کا مظاہرہ پیش کیا۔
تعلقہ میدان (وائی ایم ایس اے) میں منعقدہ فائنل میچ میں اترکنڑا ڈیف کرکٹ ٹیم نے دکشن کنڑا کو 6وکٹوں سے شکست دیتےہوئے چمپئین شپ جیت لی تو خواتین زمرے میں بنگلورونے اُڈپی کے خلاف 5وکٹوں سے جیت حاصل کرتےہوئے چمپئین شپ پر قبضہ جمالیا۔
فاتح اترکنڑا ٹیم کو شاندارٹرافی کے ساتھ 30،000روپئے نقد انعام دیاگیا ، رنر اپ دکشن کنڑا ٹیم کو 15،000روپئے نقد مع ٹرافی اور تیسرا مقام حاصل کرنے والی کلبرگی ٹیم کو 10،000روپئے نقد مع ٹرافی بطور انعام دیاگیا۔پلئیر آف دی ٹورنامنٹ اترکنڑاٹیم کے ثوبان آرمار، بہترین بیٹسمین کے طور پر کلبرگی کے وشوناتھ اور بہترین باولر کے طورپر دکشن کنڑا کے ابھیشک کوخطاب اور انعام سے نوازاگیا۔ اترکنڑا ٹیم کے ہونیا موگیر فائنل میں مین آف دی میچ بنے۔
ٹورنامنٹ میں جیت حاصل کرنےو الی بنگلورو کی خواتین کرکٹ ٹیم کو شاندار ٹرافی کے ساتھ 8،000روپئے نقد اور رنر اپ اُڈپی ٹیم کو 5،000روپئے نقد کےساتھ ٹرافی دی گئی ۔ خواتین کے زمرےمیں پلئیر آف دی ٹورنامنٹ بنگلورو کی اپرنا ہیگڈے نے حاصل کیا۔ بیسٹ بیٹسمین کا خطاب بنگلورو کی لکشمی کو اور بیسٹ باولر کا خطاب اُڈپی کی ہرشیتا کو دیاگیا ۔ فائنل میچ میں ویمن آف دی میچ کا خطاب بنگلورو کی اپرنا ہیگڈے کو دیاگیا ۔
انعامی تقریب میں مجلس اصلاح وتنظیم بھٹکل کے صدر عنایت اللہ شاہ بندری ، جنرل سکریٹری عبدالرقیب ایم جے، رنجن گیس ایجنسی کی شیوانی شانتارام، عبدالسلام شاہ بندری ، عبدالسمیع کولا، اترکنڑا ڈیف اسوسی ایشن کی صلاح کار دویا شری وئیدیا ، اترکنڑا اسوسی ایشن کے صدر ہونیا موگیر ، جنرل سکریٹری یوسف موٹیا، ٹیکنکل ڈائرکٹر نئی دہلی گنیش رووا، جنرل سکریٹری بنگلورو جی ایس نوین کمار سمیت کئی عہدیداران موجود تھے۔