بھٹکل میونسپالٹی انتخابات کے لئے51 اُمیدواروں نے داخل کیا پرچہ نامزدگی؛ 9 اُمیدوار بلامقابلہ منتخب ہونا طئے؛ 29 مئی کو ہوں گے انتخابات
بھٹکل 17/مئی (ایس او نیوز) بھٹکل میونسپالٹی کے لئے 29 مئی کو ہونے والے انتخابات میں جملہ 23 سیٹوں کے لئے 51 اُمیدواروں نے 53 پرچہ نامزدگیاں داخل کی ہیں۔ جمعرات کو پرچہ داخل کرنے کی آخری تاریخ تھی جس کے ساتھ ہی یہ صاف ہوگیا ہے کہ جملہ 23 سیٹوں میں سے 9 سیٹوں پر کوئی مقابلہ نہیں ہوگا کیونکہ ان سیٹوں پر صرف ایک ایک اُمیدوار نے ہی پرچہ نامزدگی داخل کئے ہیں، چھ وارڈوں پر دو دو اُمیدوار جبکہ چار وارڈوں میں تین تین اُمیدوار میدان میں ہیں۔ تین وارڈوں کے لئے چار چار اُمیدوار اور وارڈ نمبر 11 پر جملہ چھ اُمیدواروں نے پرچہ داخل کیا ہے۔ ان باتوں کی جانکاری الیکشن آفسر ایم بی پاٹل نے دی جو بھٹکل کے تحصیلدار بھی ہیں۔
انہوں نے بتایا کہ آج پیپروں کی جانچ مکمل ہو چکی ہے اور تمام پرچے درست پائے گئے ہیں، اس کے ساتھ ہی نو سیٹوں پر اُمیدوار بلا مقابلہ منتخب ہونا تقریباً طئے ہے، اُن کے نام یہ ہیں:
وارڈ نمبر؛ 1 ..... سبین تاج، 2: پرویز قاسمجی، 5: جگناتھ گونڈا، 9: شبینہ شینگیری، 12: عبدالروف نائطے، 13: آسیہ سدی باپا، 14: روبینہ ذاکر حُسین، 17: محمد عظیم محتشم اور وارڈ نمبر 21: چامنڈی فاطمہ
یاد رہے کہ 20/مئی کو پرچہ واپس لینے کی آخری تاریخ ہے، جس کے دوران بعض اُمیدوار اپنے پرچے واپس لے سکتے ہیں، اُس کے بعد ہی مطلع صاف ہوجائےگا کہ کہاں کہاں انتخابات ہوں گے اور کن کن وارڈوں میں اُمیدوار بلا مقابلہ منتخب ہوتے ہیں۔
خیال رہے کہ میونسپالٹی انتخابات میں جن امیدواروں نے پرچہ نامزدگی داخل کیا تھا، اُن میں سب سے زیادہ یعنی 37 پرچے آزاد اُمیدواروں کی طرف سے داخل کئے گئے ہیں، نو پرچے بی جے پی، پانچ کانگریس اور دو پرچے جے ڈی ایس کی طرف سے داخل ہوئے ہیں۔