بھٹکل 31 اکتوبر (ایس او نیوز)  عدالت میں اسٹے، پھر اسٹے ہٹنے کے بعد اب بھٹکل تحصیلدار روی چندرا نے ٹاون میونسپالٹی کے صدر اور نائب صدر کے  انتخاب کے لئے 5 نومبر کی تاریخ کا اعلان کیا ہے۔

 ٹاون میونسپل    کاونسلرس کے نام جاری سرکیولر کے مطابق بھٹکل ٹاؤن میونسپالٹی کی نو ویں میقات کے لئے صدر اور نائب صدر کا انتخاب 5 نومبر کو  کونسلرس کی میٹنگ میں کیا جائے گا۔ سرکیولر کے مطابق صبح دس بجے کاروائی شروع ہوگی جو 11:30 بجے تک چلے گی۔  یاد رہے کہ یہ دونوں عہدے عام زمرے میں ہیں۔ 

جیسا کہ پہلے بتایا جاچکا ہے، بھٹکل ٹاون میونسپل کونسل کے جملہ  23 کونسلروں میں   تین چار کونسلروں کو چھوڑ کر باقی زیادہ تر کونسلرس قومی سماجی ادارہ مجلس اصلاح و تنظیم کی حمایت سے جیتنے میں کامیاب ہوئے ہیں، جس میں  16 کونسلرس مسلم ہیں۔ اس بنا پر تنظیم  کی طرف سے  صدر اور اور نائب صدر کے عہدوں کے لئے جن  اُمیدواروں کو میدان میں اُتارے گی، اُن کی جیت تقریباً یقینی ہے۔

بتاتے چلیں  کہ قومی سماجی ادارہ مجلس اصلاح و تنظیم میں گذشتہ روز ہوئی انتظامیہ میٹنگ میں اس بات کا فیصلہ ہوچکا ہے کہ  تنظیم کی طرف سے  صدر کے عہدہ کے لئے سابق میونسپل صدر پرویز قاسمجی اور نائب صدر کے عہدہ کے لئے  قیصر محتشم کو منتخب کیا ہے جو 5 نومبر کو ہونے والے انتخابات میں کھڑے ہوں گے۔