بھٹکل ٹی ایم سی میٹنگ میں اراکین نے اٹھایامچھلی مارکیٹ منتقل کرنے کا مسئلہ ۔ دیگر اہم امور پر بھی ہوا غور وخوض
بھٹکل 3؍ستمبر (ایس او نیوز) بھٹکل اسسٹنٹ کمشنر بھرت کی صدارت میں منگل کو ٹاؤن میونسپل کاونسل کے منتخب اراکین کی نشست منعقد ہوئی۔جس میں کاونسلر عبدالرؤف نائطے اور عبدالعظیم نے پرانے بس اسٹانڈ کے پاس واقع پرانی مچھلی مارکیٹ کو نئی عمارت میں منتقل کرنے کا مسئلہ اٹھاتے ہوئے کہا کہ پچھلی میعاد میں مارکیٹ منتقل کرنے کی قرار داد اُس وقت کے اراکین نے منظور کی تھی۔ اب موجودہ اراکین بھی مارکیٹ منتقل کرنے کی حمایت کرتے ہیں۔لیکن افسران اس معاملے پر خاموشی اختیار کیے ہوئے ہیں۔
اس کا جواب دیتے ہوئے اسسٹنٹ کمشنر بھرت نے کہا کہ مچھلی فروشوں اور اطراف کے دکانداروں کو اس پر آمادہ کرنے کی کوشش کی جارہی ہے،اور یہ کام آگے بڑھ رہا ہے۔ کاونسلر قیصر محتشم نے بتایا کہ 200کروڑ روپے کی لاگت سے چل رہےیو جی ڈی منصوبے کے تعلق سے کونسلروں کی توجہ اس جانب مبذول کرائی کہ اس پروجکٹ پر اصل ٹھیکیدے دار کام نہیں کررہا ہے بلکہ ذیلی ٹھیکیداروں کی جانب سے کام آگے بڑھ رہا ہے۔اور تعمیری کام کے معیارپر سوالیہ نشا ن لگے ہوئے ہیں۔ اس بات کی حمایت کاونسلر عبدالرؤف نے بھی کی۔ اس معاملے پر اسسٹنٹ کمشنر نے بلدیہ کے انجینئر کو ہدایت دی کہ وقتاً فوقتاً کام کی رفتار اور معیار کی جانچ کیا کرے۔ کاونسلر فیاض ملا اور پاسکل گومز نے اسٹریٹ لائٹ کا مسئلہ اٹھایااور کہا کہ اس کا انتظام اطمینا ن بخش طریقے پر نہیں ہورہا ہے۔کاونسلر موہن نائک نے منکولی میں بارش کے موسم میں پانی کی نکاسی کا نظام درست نہ ہونے اور اس کی وجہ سے عوام کو درپیش مشکلات کا مسئلہ اٹھایا ۔ اس کے علاوہ بلدیہ کا ٹیکس وصولی سمیت اس بات کی طرف بھی اے سی کی توجہ دلائی کہ ڈپارٹمنٹ ٹھیک ڈھنگ سے کام نہ کرنے کی وجہ سے بلدیہ کی آمدنی متاثر ہورہی ہے۔
آخر میں اسسٹنٹ کمشنر نے اراکین سے مخاطب ہوکر کہا کہ کووڈ سے نجات پانے کے لئے تمام لوگوں کے تعاون کی بہت زیادہ ضرورت ہے۔ اگر ضلع بھر کی صورتحال کو دیکھیں تو بھٹکل میں سب سے زیادہ اموات واقع ہوئی ہیں۔ اس لئے عوام کو غفلت اور بے پروائی کا مظاہرا نہیں کرنا چاہیے۔اس موقع پرٹی ایم سی چیف آفیسر دیوراج، پروجیکٹ وینو گوپال شاستری اور دیگر افراد موجود تھے۔