بھٹکل گُڈلک روڈ میں پائپ لائن بچھانے کے کاموں میں عوام کی طرف سے شکایات کے بعد بھٹکل میونسپل چیف نے واٹربورڈ کے آفسران کے ساتھ رکھی میٹنگ
بھٹکل 23 نومبر (ایس او نیوز) بھٹکل کے کارگیدے اور گُڈلک روڈ میں کل اتوار کو عوام الناس کی طرف سے انڈر گراونڈ ڈرینج (یو جی ڈی) کے پائپ لائن بچھانے اور چمبرس تعمیر کرنے کے دوران کام کو غیر سائنٹیفک اور غیر معیاری قرار دینے کے بعد آج پیر کو بھٹکل میونسپل چیف پرویز قاسمجی نے کاروار سے واٹر بورڈاور یوجی ڈی کے انجینئر ششی دھر ہیگڈے، کنٹریکٹرس بینسین مورے، پروجکٹ مینجر شائلیش پٹیل سمیت بھٹکل ٹاون میونسپل انجینر اُمیش مڈیوال اور چیف آفسر دیوراج کے ساتھ ایک میٹنگ کا انعقاد کیا جس میں بھٹکل کے قومی سماجی ادارہ مجلس اصلاح و تنظیم کے صدر بھی موجود تھے۔
اس موقع پر میونسپل صدر پرویز قاسمجی نے سخت ہدایات دیتے ہوئے انجینروں کو واضح کیا کہ بھٹکل میں یو جی ڈی کے کاموں میں کسی بھی طرح کے غیر معیاری کاموں کو برداشت نہیں کیا جائے گا، کوالٹی میں کوئی سمجھوتا نہیں کیا جائے گا، اسی طرح بھٹکل میں کام جاری رہنے کے دوران انجینئر س کو بھٹکل میں ہی کیمپ کرنا ہوگا اور تمام کام اُن کی نگرانی میں انجام دینا ہوگا، اسی طرح انہوں نے پروجکٹ کے کنٹریکٹرس کو بھی ہدایت دی کہ انہیں بھٹکل سے اگر کہیں باہر جانا ہوتو پہلے اُنہیں اس کی پیشگی خبر دینی ہوگی اور بتاکر ہی باہر جانا ہوگا۔ تاکہ ان کی غیر موجودگی میں بھی کاموں کی نگرانی رکھی جاسکے۔
پرویز قاسمجی نے گُڈلک روڈ اور کارگیدے میں ہوئے کاموں کے تعلق سے بھی آفسران اور انجینروں کے ساتھ تفیصلات حاصل کیں اور کئی ایک اُمور پر بات چیت کی اور اس بات کو یقینی بنایا کہ آئندہ کسی بھی طرح کی کوئی غفلت نہیں برتی جائے گی۔
خیال رہے کہ بھٹکل میں میونسپل حدود کے پرانے محلوں میں چمبروں اور پائپ لائن میں جہاں خرابی پائی جارہی ہے ، وہاں مرمت کا کام جاری ہے جبکہ عنقریب میونسپل حدود کے نوائط کالونی، بندر روڈ، مدینہ کالونی وغیرہ علاقوں میں پائپ لائن بچھانے اور چمپرس وغیرہ کا کام شروع ہونے والا ہے۔ مگر کام شروع ہونے سے پہلے ہی میونسپل صدر پرویز قاسمجی نے ضروری ہدایات جاری کی ہیں اور اس بات کو یقینی بنانے کی کوشش کی ہے کہ یہاں کام کے دوران مکمل نگرانی رکھی جائے گی۔