بھٹکل 17/ اگست (ایس او نیوز) شہر کے قلب میں واقع شمس الدین سرکل پر موٹر گاڑیوں کی آمد و رفت کی نگرانی اور ٹریفک قوانین کی پابندی کو یقینی بنانے کے لئے ٹاون پولیس اسٹیشن کی طرف سے ایک ٹریفک پولیس چوکی کا قیام عمل میں آیا جس کا افتتاح بھٹکل ڈپٹی سپرنٹنڈنٹ آف پولیس کے یو بیلی اپّا نے کیا ۔
اس موقع پر خطاب کرتے ہوئے انہوں نے کہا کہ بھٹکل میں روز بروز موٹر گاڑیوں کی تعداد میں اضافہ ہوتا جا رہا ہے اور اس پر قابو پانے میں پولیس کو بھی دشواری پیش آ رہی ہے ۔ سردی، گرمی، دھوپ اور بارش کی پروا کیے بغیر پولیس کے لئے موٹر گاڑیوں کی آمد و رفت کنٹرول کرنے کے لئے ایک چوکی کی ضرورت محسوس کی جا رہی تھی ۔ اس لئے ٹاون پولیس کی طرف سے یہ چوکی قائم کی گئی ہے ۔ چونکہ ہائی وے کی توسیع کا کام جاری ہے اس لئے نگرانی کرنے کے لئے پولیس والوں کو ہائی وے پر کھڑا رہنا مشکل ہو رہا تھا ۔ اب اس چوکی کے ذریعے ان کے لئے آسانی پیدا کی گئی ہے ۔
انہوں نے کہا کہ پچھلے دنوں جب ضلع ایس پی نے عوام سے رابطہ کا جو پروگرام منعقد کیا تھا اس میں عوام کی طرف سے ٹریفک کے مسائل اور شکایتیں پیش کی گئی تھیں ۔ ان مسائل کے حل کی طرف پہلے قدم کے طور پر نیشنل ہائی وے کے پاس چوکی قائم کردی گئی ہے ۔
ٹاون پولیس اسٹیشن کے سرکل انسپکٹر دیواکر پی ایم نے کہا شمس الدین سرکل جیسے شہر کے قلب والے حصے میں موٹر گاڑی چلانے والوں سے ٹریفک قوانین کی پابندی کروانے کے مقصد سے یہ چوکی یہاں قائم کی گئی ہے ۔ امید ہے کہ اب قوانین کی خلاف ورزی کرنے سے یہ لوگ گریز کریں گے ۔
اس موقع پر دیہی پولیس اسٹیشن کے سرکل انسپکٹر مہابلیشور نائک ، ٹاون پولیس اسٹیشن کے سب انسپکٹر ایچ کوڈگنٹی ، سوما بی ، دیہی پولیس اسٹیشن کے سب انسپکٹر بھرت کمار اور دیگر پولیس اہلکار اور عام افراد موجود تھے۔