بھٹکل کے قریب مرڈیشور میں ٹمپو اور بائک کے درمیان خطرناک ٹکر؛ دو کی موقع پر موت، ایک شدید زخمی
بھٹکل 2/جون (ایس او نیوز) یہاں مرڈیشور پولس تھانہ حدود کے ترن مکّی نیشنل ہائی وے پر ایک تیز رفتار ٹمپو اور بائک کے درمیان ہوئی ٹکر میں بائک پر سوار دو لوگوں کی موقع پر ہی موت واقع ہوگئی ، جبکہ ایک شدید زخمی ہوگیا۔
مرنے والوں کی شناخت شرالی الوے کوڈی کے رہنے والے گنیش نارائن نائک (40) اور کرشنا منجوناتھ نائک (55) کی حیثیت سے کی گئی ہے۔شدید زخمی نوجوان کرشنا بائیرا نائک (32) کو بھٹکل سرکاری اسپتال میں ابتدائی طبی امداد فراہم کرنے کےبعد منی پال روانہ کیا گیا ہے۔
حادثہ اتوار دوپہر قریب ڈھائی بجے پیش آیا۔ بتایا گیا ہے کہ بائک پر سوار تینوں لوگ مرڈیشور کے بستی مکّی میں منعقدہ شادی کی تقریب میں دوپہر کے کھانے کے بعد واپس اپنے گھر شرالی ۔الوے کوڈی جارہے تھے کہ مخالف سمت سے آنے والی ایک اور شادی کی تقریب کی ٹمپو سے ان کی بائک ٹکرا گئی۔ بتایا گیا ہے کہ ٹمپو منڈلی میں منعقدہ ایک شادی کی تقریب میں باراتیوں کو چھوڑ کر واپس مرڈیشور جارہی تھی۔
مرڈیشور کے ایک ذرائع نے بتایا کہ ترن مکّی کراس پر نیشنل ہائی وے کی توسیعی کام کی وجہ سے روڈ کو ڈائورٹ کیا گیا ہے، حادثہ اُسی جگہ پیش آیا ہے۔
بتایا گیا ہے کہ مرنے والے گنیش اور کرشنا دونوں الوے کوڈی میں ماہی گیری کا کام کرتے تھے، کرشنا بینگرے پنچایت میں سابق صدر تھے، جن کو چار اولاد ہیں جبکہ گنیش کو دو چھوٹے بچے ہیں۔ زخمی کرشنا بائیرا نائک کھیتی باڑی کا کام کرتا ہے۔
مرڈیشور پولس تھانہ میں معاملہ درج کیا گیا ہے، مزید چھان بین جاری ہے۔
