بھٹکل یکم مارچ (ایس او نیوز)بھٹکل کے ٹیکسی (پیلے نمبر پلیٹ والی کار) ڈرائیوروں اور مالکان کی ایسوسی ایشن نے آر ٹی او کو ایک میمورنڈم پیش کرتے ہوئے  مطالبہ کیا ہے کہ  پرائیویٹ  (سفید نمبر پلیٹ والی) کار والوں کے خلاف قانونی کارروائی کرے، جو کرایے پر مسافروں کو لے جانے کاکام کررہے ہیں۔

ٹیکسی ایسوسی ایشن کے اراکین کا کہنا ہے کہ ہم لوگ قرض پر گاڑیاں خریدتے ہیں اور سرکاری قوانین کے مطابق کرایے پر گاڑی چلانے کی اجازت لینے کے علاوہ متعلقہ ٹیکس بھی اداکرتے ہیں۔مگر ہم لوگ جہاں قطار میں کھڑے ہوکر مسافروں کا انتظار کرتے ہیں ، وہاں کچھ پرائیویٹ گاڑیاں آجاتی ہیں اور مسافروں کو غیر قانونی طور پر ایک مقام سے دوسرے مقام پر لے جاتی ہیں، جبکہ ٹیکسی کے قوانین کے مطابق ان گاڑیوں کا ٹیکس ادانہیں کیا جاتا۔اس کے علاو ہ کچھ رکشہ ڈرائیور اپنی پرمٹ کی حد سے باہرجاتے ہوئے بیندور اور ہوناور تک مسافروں کو لے جاتے ہیں۔اس کی وجہ سے ہم جیسے قانونی طور پر ٹیکسی کا کاروبار چلانے والوں کا نقصان ہوتا ہے اورہمارے ساتھ ناانصافی ہوتی ہے۔اسوسی ایشن نے  آر ٹی او سے مطالبہ کیا ہے کہ اس طرح نجی کاروں کوغیر قانونی طور پر ٹیکسی بنانے والوں کے خلاف کارروائی جائے۔

بعد میں اخبار نویسوں سے گفتگو کرتے ہوئے اسوسی ایشن کے ذمہ داروں نے بتایا کہ غیر قانونی طور پر پرائیویٹ کاروں کو ٹیکسی کے طور پر استعمال کرکے مسافروں کو مینگلور ائرپورٹ یا گوا ائیرپورٹ یا دیگر مقامات پر لے جانے کی صورت میں ٹیکسی ڈرائیورس اُن کو راستے میں ہی  روک کر مسافروں کو نیچے اُتارسکتے ہیں۔ اس تعلق سے بھی اسوسیی ایشن کے ذمہ داروں نے آر  ٹی او کو مطلع کیا ہے ۔ اسوسی ایشن کے ذمہ داروں نے بالخصوص ائرپورٹ جانے والوں سے درخواست کی ہے کہ وہ پرائیویٹ کاروں پر ائرپورٹ نہ جائیں، اگر آپ ایسا کرتے ہیں اور راستے میں ڈرائیوروں کو معلوم ہوجانے کی صورت میں آپ کی پرائیویٹ کار کو روکا جاتا ہے تو آپ کی فلائٹ مس ہوسکتی ہے، جس کے لئے آپ خود ذمہ دار ہوں گے۔

اس موقع پر رمیش، فوزان ، دانش اور دیگر اراکین موجود تھے۔