بھٹکل :28؍جنوری(ایس اؤ نیوز)بھٹکل کا سب سے بڑا قومی سماجی ادارہ مجلس اصلاح و تنظیم نے کل 29جنوری کوملک گیر سطح پر بہوجن کرانتی مورچہ کی طرف سے سی اے اے اور این آر سی کے خلاف منائے جارہے پرامن بند کی مکمل حمایت کا اعلان کیا ہے اور عوام الناس سے اپیل کی ہے کہ وہ صبح سے شام 5بجے تک اپنے کاروباراور تمام دکانیں بند رکھیں اور بند کو کامیاب بنانے اپنی جانب سے ہر ممکن تعاون دیں۔
اخبار نویسوں سے گفتگو کرتے ہوئے تنظیم کے جنرل سکریٹری ایم جے عبدالرقیب نے بتایا کہ تنظیم کی طرف سے بھٹکل میں بند کو کامیاب بنانے ہر ممکن کوشش کی جائے گی۔ انہوں نے بتایا کہ بند کے دن نہ صرف دکانیں بلکہ کسی بھی طرح کی خرید و فروخت اور تعمیراتی کاموں کو مکمل طور ہر بند کرنے کی عوام سے اپیل کی گئی ہے، ساتھ ساتھ آٹو رکشا سروس بھی بند رکھنے کے لئے کہا گیا ہے۔ انہوں نے واضح کیاکہ ملک کے دانشور حضرات اور اکابر علماء کرام نے بھی اس بند کی مکمل حمایت کرنے کی اپیل کی ہے جس کے تحت تنظیم نے بھارت بند کی مکمل حمایت کرنے فیصلہ لیا ہے۔
خیال رہے کہ بھٹکل میں بند کو مجلس اصلاح و تنظیم کی حمایت حاصل ہوتے ہی بھٹکل میں انجمن سمیت کئی تعلیمی اداروں نے اسکولوں اور کالجوں میں چھٹی کا اعلان کیا ہے البتہ جن طلبا کے بورڈ کے امتحانات چل رہے ہیں، وہ بحال رہیں گے اور طلبا امتحانات میں شریک ہوسکیں گے۔
بھٹکل میں تنظیم کی آواز پر کل بدھ کو تقریبا تمام کاروباری ادارے بھی بند رہنا تقریبا طئے سمجھا جارہا ہے۔ عوام الناس سے اپیل کی گئی ہے کہ وہ گھروں سے باہر بھی نہ نکلیں، اگر کوئی دکان کھلی رہتی ہے تو اُن دکانوں میں کوئی خریداری نہ کی جائے، اسی طرح آٹو رکشہ بند نہ رہنے کی صورت میں آٹو پر سوار نہ ہونے کی بھی اپیل کی گئی ہے۔
اخبار نویسوں سے گفتگو کرنے کے دوران تنظیم کے سابق صدر اور ہائی کورٹ کے وکیل مزمل قاضیا سمیت تنظیم کے عہدیداران بھی موجود تھے۔