بھٹکل 20اپریل (ایس او نیوز)آج منگل کو  بھٹکل کے قومی سماجی ادارہ مجلس اصلاح وتنظیم کےصدر جناب ایس ایم پرویز اور بھٹکل میونسپالٹی کے صدر جناب قاسمجی پرویز نے  سرکاری اسپتال پہنچ کر کووڈ ٹیکہ لگوایا  اور مسلمانوں پر زور دیا کہ کوویڈ سےمحفوظ رہنے کے لئے  تمام لوگوں کو کووڈ ٹیکہ لگوانا ضروری ہے۔ انہوں نے بتایا کہ    ملک میں ایک طرف کورونا  کے معاملات میں اچانک اضافہ ہورہا ہے وہیں   ممبئی سمیت بڑے بڑے شہروں میں کورونا  ٹیکہ کی  سخت قلت پائی جارہی ہے۔ شہروں میں  لوگ  کورونا سے محفوظ رہنے کےلئے ٹیکہ لگانے اسپتالوں کا رُخ کررہے ہیں لیکن اسپتالوں میں ٹیکہ نہیں مل رہا ہے،  وہیں دوسری طرف بھٹکل کا حال بالکل مختلف ہے، یہاں سرکاری اسپتال  میں ٹیکہ کاری مہم جاری ہے دور دراز کے  دیہاتوں سے لوگ کثیر تعداد میں اسپتال پہنچ کر ٹیکہ لگوارہے ہیں، لیکن   ٹیکہ لگوانے والوں میں   مسلمان  کافی پیچھے نظر  آرہے ہیں۔

ایس ایم پرویز نے بتایا کہ  سوشیل میڈیا پر کورونا ٹیکہ کو لے کر بے بنیاد اور جھوٹی باتیں پھیلائی جارہی ہیں،  ایس ایم پرویز نے بتایا کہ میں نے اپنے ڈاکٹر سے پہلے صلاح و مشورہ کیا اور ڈاکٹر کی ہدایت پر میں نے آج کورونا کا ٹیکہ لیا ہے،  انہوں نے بتایا کہ  بھٹکل کے تمام لوگوں بالخصوص تمام مسلمانوں کو یہ ٹیکہ لگوانا چاہئے تاکہ بھٹکل کووڈ فری شہر بن سکے۔انہوں نے بتایا کہ بھٹکل میں کوویڈ ویکسین لینے سے کسی کو بھی کوئی منفی اثرات پیدا ہونے کی کوئی رپورٹ نہیں ہے۔مسلمانوں کے دلوں میں کوویڈ ٹیکہ کو لے کر  جو خدشات پائے جارہے ہیں، ہمیں اُن سے باہر نکلنا چاہئے، انہوں نے عوام الناس سے اپیل کی کہ وہ سرکاری اسپتال کی اس سہولت کافائدہ اُٹھائیں۔

جناب قاسمجی پرویز نے بتایا کہ  دنیا میں پھیلی کوویڈ وبا سے محفوظ رہنے کے لئے دنیابھر میں لوگ کووِڈ ویکسین کا ڈوز  لے رہے ہیں، سائنسدانوں نے پوری محنت اور جانفشانی سے کام کرتے ہوئے ویکسین تیار کیا ہے، ایسے میں ہمیں سوشیل میڈیا پر پھیلی باتوں کو نظر انداز کرنا چاہئے اور اپنی صحت کا خیال رکھتے ہوئے کورونا کا ٹیکہ لگوالینا چاہئے۔ انہوں نے عوام الناس سے اپیل کی کہ وہ جلد ازجلد  خود بھی کورونا ٹیکہ لیں ، اپنے گھروالوں کو بھی ٹیکہ لگوائیں۔

بھٹکل تعلقہ سرکاری اسپتال کی ہیلتھ آفسر ڈاکٹر سویتا کامتھ نے بتایا کہ بھٹکل میں ہر روز قریب سو لوگوں کو کووِڈ کا ٹیکہ دیا جارہا ہے ۔ لوگ دور دراز علاقوں سے آکر ٹیکہ لگوارہے ہیں، البتہ  بھٹکل ٹاون کے لوگ بے حد کم آرہے ہیں۔ انہوں نے کہا کہ اب تک 7200 سے زائد لوگوں کو بھٹکل میں ٹیکہ لگوایا جاچکا ہے، ابھی تک کسی طرح کی کوئی شکایت موصول نہیں ہوئی ہے۔ڈاکٹر سویتا کامتھ نے عوام الناس سے درخواست کی کہ یہاں یہ ٹیکہ بالکل مفت لگوایا جارہا ہے، اس سے بھرپور فائدہ اُٹھائیں  اور ٹیکہ لگوانے کے لئے اپنے گھروالوں کو بھی ساتھ لے کر آئیں۔ انہوں نے بتایا کہ فی الحال 45 سال یا اس سے زائد عمر والوں کو یہ ٹیکہ لگوائے جانے کی مہم جاری ہے، یکم مئی سے 18 سال یا اس سے زائد عمر والوں کو بھی ٹیکہ لگوانے کی مہم شروع ہوجائے گی۔

چونکہ  45 سال یا اس سے زائد عمر والوں کو ٹیکہ لگوایا جارہا ہے، اس لئے اسپتال میں ٹیکہ لگوانے والوں کی  قطار زیادہ لمبی نہیں ہے، لیکن یکم مئی سے 18 سال  کی عمر والوں کو بھی ٹیکہ لگوانے کی مہم شروع ہو جائے گی تو اُس وقت اسپتال میں پاوں رکھنے کی جگہ ملنا مشکل نظر  آرہا ہے، ان باتوں کا خیال رکھتے ہوئے 45 سال سے زائد عمر والے   عوام الناس کو چاہئے کہ وہ یکم مئی سے پہلے پہلے ٹیکہ لگوائیں۔