بھٹکل 8/مئی (ایس او نیوز) یہاں غوثیہ اسٹریٹ میں شرابی ندی پر  ڈیم کی تعمیر کے لئے  ڈالی گئی مٹی کو فوری ہٹانے کا مطالبہ کرتے ہوئے قومی سماجی ادارہ مجلس اصلاح و تنظیم نے  بھٹکل اسسٹنٹ کمشنر کو میمورنڈم پیش کیا۔ میمورنڈم میں بتایا گیا ہے کہ ڈیم کی تعمیر کے لئے ندی کے بہاو  کو روکنے  کے لئے شرابی ندی میں  تین سو لوڈ مٹی ڈالی گئی تھی، ڈیم کا کام تقریبا مکمل ہوچکا ہے، مگر شرابی ندی میں ڈالی گئی مٹی کو ابھی تک نکالا نہیں گیا ہے۔

بدھ کی صبح تحصیلدار دفتر میں اے سی ساجد مُلا سے  ملاقات کرتے ہوئے تنظیم وفد نے  اے سی پر زور دیا کہ  مانسون کی آمد سے پہلے اگر اس ندی سے مٹی کو نہیں ہٹایا گیا  اور اسے صاف نہیں کیا گیا تو بارش ہونے کی صورت میں پورے علاقہ کے عوام کو سخت پریشانی کا سامنا کرنا پڑسکتا ہے۔ ڈیم میں پانی جمع ہونے سے پورا علاقہ زیرآب آنے کا خدشہ ہے۔ان سب  وجوہات کو دیکھتے ہوئے  فوری طور پر  مٹی کو ندی کو نکالا جائے۔

تنظیم وفد کی قیادت تنظیم صدر ایس ایم پرویز نے کی، جنرل سکریٹری ایم جے عبدالرقیب، محی  الدین الطاف کھروری، جیلانی شاہ بندری، سید عمران لنکا، اشفاق کے ایم ودیگر ذمہ داران اس موقع پر موجود تھے۔