بھٹکل محکمہ تحصیل میں عوامی شکایات کو سننے والا کوئی نہیں ہے : تعلقہ پنچایت میٹنگ میں ممبران کااعتراض
بھٹکل:5؍فروری(ایس اؤ نیوز)بھٹکل محکمہ تحصیل میں عوام کی شکایات اور اُن کے مسائل کو سننے والا کوئی نہیں ہے، بارش میں بے گھر ہونے والے سندھیا سرکشھا مستفیدین، آدھار کارڈ بنانے والے دفتر کا چکر کاٹتے کاٹتے سست ہوگئے ہیں ، مگر اُن کے مسائل حل نہیں ہورہے ہیں، اس بات کی شکایت تعلقہ پنچایت ممبران نے تعلقہ پنچایت کی عام میٹنگ میں کی۔
میٹنگ میں معاملے کو پیش کرتےہوئے وشنو دیواڑیگا ، ہنومنت نائک، پاشور ناتھ جین وغیرہ نے کہاکہ ہمیں بتایا جارہاہے کہ جو لوگ بارش کے موسم میں اپنے گھروں کو کھوچکے ہیں، ان کے لئے معاوضہ کی منظوری ہوچکی ہے مگر اب تک مستفیدین کو رقم نہیں پہنچنے سے متاثرین کافی مشکلات میں ہیں انہوں نے آدھار کارڈ کا مسئلہ جوں کا توں جاری رہنے پر عدم اطمینان کا اظہار کیا۔ جس کی صدر ایشو ر نائک نے بھی حمایت کی۔ تحصیلدار وی پی کوٹرولی نے ٹیکنکل خرابی سے دشواری ہونے کی بات کہتے ہوئے جلد ہی ٹھیک کرنے کا تیقن دیا۔ اور بتایا کہ آدھار کارڈ تقسیم کرنے کے لئے زائد مراکز قائم کئے گئے ہیں امید ہے کہ مسئلہ جلد حل ہوجائے گا۔
بینگرے گرام پنچایت صدر وینکٹیا بھئیرو منے نے فصل بربادی پر کہاکہ جنگلی سوروں کی وجہ سے کھیتوں کی ہری بھری فصل برباد ہورہی ہے، جس کا کوئی معاوضہ بھی نہیں مل رہاہےتو کسان کیا کریں ؟۔جس کی وضاحت کرتےہوئے آر ایف اؤ سویتا دیواڑیگا نے کہاکہ یہ ہمارے محکمہ کا مسئلہ نہیں ہے، یہ سرکاری سطح پر طئے ہونا چاہئے ۔ دیہاتوں میں محکمہ آب پاشی کے تعمیراتی کام وغیرہ کو لےکر ممبران نے سوالات کی بوچھار کردی۔ انجنئیر ایم جی نائک نے کہاکہ سنگ بنیاد وغیرہ سرکاری کام نہیں ہیں، البتہ ٹھیکدار خود ہی دعوت دے کر وہ سب کرتےہیں۔ جس پر صدر ایشور نائک نے اعتراض جتاتے ہوئے عوامی نمائندوں کی عزت ہے یا نہیں سوال کیا۔ ضلع پنچایت کاموں کے متعلق بھی افسران کی طرف سے جانکاری نہیں دئیے جانے پر ممبران نے اعتراض جتایا۔ نائب صدر رادھا اشوک وئیدیا، تعلقہ پنچایت افسر پربھاکر چکنمنے موجود تھے۔ مینجر سدھیر گاونکر نے استقبال کیااور آخر میں شکریہ اداکیا۔