بھٹکل 10/فروری (ایس او نیوز) بھٹکل سب ڈیویزن کے لئے گوتم کے سی کو نیا ڈی وائی ایس پی مقرر کیا گیا ہے۔ گوتم کے سی ٹمکور کے رہنے والے ہیں اور وہ تاحال چکبالاپور میں پروبیشنری ڈی وائی ایس پی کی ذمہ داری ادا کر رہے تھے۔ اتوار کے دن آپ نے بھٹکل ڈی وائی ایس پی کا چارج لیا ہے۔

چونکہ بھٹکل کے اے ایس پی نکھل بی ٹریننگ کے لئے چار ماہ کی چھٹی پر چلے گئے ہیں، اس لئے ان کی جگہ پرڈی وائی ایس پی اروند کلگُجّی نے     عبوری چارج لیا تھا۔اب اروند کلگجی نے اس عہدے کا باقاعدہ چارج پروبیشنری ڈی وائی ایس پی گوتم کے سی کو دیا ہے۔ڈی وائی ایس پی گوتم نے 2017میں اپنی تربیت مکمل کی تھی اور2019میں ان کو چکبالاپور کا پروبیشنری ڈی وائی ایس بنادیا گیا تھا۔تاحال وہ پروبیشنری (آزمائشی) میعاد سے گزر رہے ہیں۔

اخباری نمائندوں سے بات کرتے ہوئے انہوں نے کہا کہ میں نے آج ہی اس عہدے کا چارج لیا ہے۔ آئندہ دنوں میں تمام پولیس اسٹیشنوں کا معائنہ کروں گا۔بھٹکل کے حالات سے مکمل آگاہی حاصل کرتے ہوئے عمدہ طریقے سے خدمات انجام دینے کی کوشش کروں گا۔ شہر کے عوام اور میڈیا والوں کی طرف سے پولیس محکمے کو بھرپور تعاون ملنا چاہیے۔