بھٹکل : سرکاری افسران اور دیہی عوام کا رابطہ ۔ کوپّا گرام میں موقع پر ہی حل کیے گئے 128 معاملات
بھٹکل ،21؍ مارچ (ایس او نیوز) دیہی عوام کے مسائل حل کرنے کے لئے حکومت کی طرف سے سرکاری افسران کا " چلو دیہات کی طرف" والا جو طریقہ وضع کیا گیا ہے، اس کے تحت بھٹکل تعلقہ کے کوپّا گرام پنچایت میں عوام سے رابطہ کا پروگرام منعقد کیا گیا جسے مقامی عوام کی جانب سے بھرپور تعاون ملا اور موقع پر ہی 128 درخواستوں کو نپٹایا گیا۔
کوپّا سرکاری اسکول کے احاطہ میں منعقدہ اس پروگرام کا افتتاح اسکول کے طلبہ نے کیا۔ نگراں اسسٹنٹ کمشنر ساجد ملا نے صدارت کی۔ اس پروگرام میں پینشن، زمین کے دستاویزات میں گڑ بڑ، بنیادی سہولتوں کے مسائل وغیرہ سے متعلقہ 264 درخواستیں عوام کی طرف سے موصول ہوئیں۔ ان میں سے پینشن، ماہانہ وظیفہ اور راشن کارڈ وغیرہ سے تعلق رکھنے والے 128 معاملے موقع پر ہی حل کیے گئے۔
یہ پروگرام صبح سے شام تک چلا جس میں اے سی کے علاوہ تحصیلدار روی چندرا ایس اور مختلف محکمہ جات کے افسران شریک رہے۔