بھٹکل 26 نومبر (ایس او نیوز) بھٹکل کے طالب علم محمد اٰمین ابن یونس بیلکے لندن یونیورسٹی میں ماسٹر آف سائنس (ایم ایس سی) میں ٹاپ پوزیشن کے ساتھ کامیاب ہوئے ہیں اور ان کی شاندار کامیابی پر انہیں یونیورسٹی آف دی ویسٹ آف اسکاوٹ لینڈ کی طرف سے گریجویشن ڈے کی تقریب میں گولڈ میڈل سے نوازا گیا ہے۔ وہ اس یونیورسٹی میں تھِین فلم ٹیکنالوجی پر ماسٹرکررہے تھے۔
پڑوسی علاقہ شیرور کے معروف گرین ویلی انٹر نیشنل اسکول سے ابتدائی تعلیم حاصل کرنے کے بعد محمد اٰمین نے آٹھویں سے پی یو سی (سائنس) کی تعلیم بھٹکل انجمن سے حاصل کی، پھر مینگلور کی سری نواس کالج آف انجینرنگ سے نانو چِپ ٹیکنالوجی پر گریجویشن مکمل کیا، پھر اعلیٰ تعلیم کے لئے لندن چلے گئے۔ لندن میں تھِن فلم ٹیکنالوجی پر انہوں نے ماسٹر آف سائنس کیا اور شاندار مارکس کے ساتھ کالج میں ٹاپ پوزیشن سے کامیاب ہوئے، جس کے نتیجے میں یونیورسٹی کے گریجویشن ڈے کے موقع پر انہیں گولڈ میڈل سے نوازا گیا۔
بھٹکل ڈونگر پلی کے رہائشی جناب یونس بیلکے کے فرزند محمد اٰمین کے لندن پہنچ کر اعلیٰ تعلیم میں نمایاں کامیابی درج کرنے اور پوری قوم وملت کا نام روشن کرنے پر بھٹکل کے مختلف اداروں کی طرف سے انہیں مبارکباد پیش کی جارہی ہے۔ شیرور گرین ویلی انٹرنیشنل اسکول کے نائب صدر اور مینجنگ ٹرسٹی جناب محمد میراں منیگار، انجمن کے صدر جناب مزمل قاضیا، جنرل سکریٹری جناب صدیق اسماعیل، قائد قوم جناب ایس ایم سید خلیل الرحمن، قومی سماجی ادارہ مجلس اصلاح و تنظیم کے صدر جناب عنایت اللہ شاہ بندری، بھٹکل مسلم خلیج کونسل کے سکریٹری جنرل جناب عتیق الرحمن مُنیری سمیت کافی دیگر ذمہ داران نے ان کی بہترین کامیابی پر مبارکباد پیش کی ہے اور نیک خواہشات کا اظہار کیا ہے۔