بھٹکل،3؍اکتوبر(ایس  او نیوز) اینڈو سلفان متاثرین کی باز آبادکاری پروگرام کے تحت scowesنامی سرسی کے ادارے کو موبائل ہیلتھ کلینک (ایمولینس) چلانے کا ٹھیکہ دیا گیا تھا۔ لیکن  scowesملازمین کا کہنا ہے کہ گزشتہ 7مہینوں سے ان کی تنخواہ حکومت کی طرف سے ادارے کو ادا نہیں کی گئی ہے جس سے اس ادارے پر مالی بوجھ بڑھ گیا ہے۔

بھٹکل تعلقہ میں scowesکے ملازمین نے اپنی بقایا تنخواہ کا مطالبہ کرتے ہوئے رکن اسمبلی سنیل نائک کے توسط سے ریاستی چیف سیکریٹری کے نام میمورنڈم دیا جس میں کہا گیا ہے کہ اینڈوسلفان متاثرین کی میڈیکل ریلیف کے لئے رقم جاری کرنے کی گنجائش رہنے کے باوجود ریاستی حکومت کی  طرف سے خواہ مخواہ اس کو روکا گیا ہے۔ اس طرح   scowes کے ملازمین اور اینڈوسلفان متاثرین کے تعلق سے بے توجہی برتی جارہی ہے۔ میمورنڈم میں مطالبہ کیا گیا ہے کہ گزشتہ سات مہینوں سے تنخواہ کی رقم جو باقی رہ گئی اس کو فوری طور پر جاری کردیا جائے، کیونکہ ملازمین بہت ہی سخت مالی مشکلات کا شکار ہوگئے ہیں۔اس کے علاوہ اسٹاف کی تنخواہیں روک کر اینڈو سلفان متاثرین کو پہنچائی جارہی طبی خدمات کی راہ میں جو افسران رکاوٹ بن رہے ہیں ان کے خلاف سخت قانونی اقدام کیا جائے۔

اس موقع پر scowesسرسی کے ایکزیکٹیو ڈائریکٹر ڈاکٹر وینکٹیش نائک کے علاوہ اسٹاف سدھیر، سنتوش وغیرہ حاضر تھے۔