بھٹکل:یکم فروری(ایس اؤ نیوز)بھٹکل میونسپالٹی حدود میں بہنے والی سرابی ندی پر تعمیر کئے گئے چک ڈیم کے دونوں طرف ریلنگ نصب کرنے اور ندی کے ہندو علاقوں کے ساتھ ساتھ مسلم علاقوں میں بھی پچنگ کرنے کا مطالبہ لےکر سماجی کارکن اور میونسپالٹی کے اسٹینڈنگ کمیٹی کے سابق چیرمین  فیاض ملا نے اترکنڑا کے ڈپٹی کمشنر سمیت بھٹکل اسسٹنٹ کمشنر اور محکمہ چھوٹی آب پاشی کو میمورنڈم پیش کیا ہے۔

ایک میمورنڈم میں انہوں نے مطالبہ کیا ہے کہ سرکاری سطح پر سرابی ندی پر تعمیر چک ڈیم پرریلنگ نصب کرنےکے لئے حکم دئیےجانےکے باوجود متعلقہ محکمہ کی جانب سے ابھی تک کام شروع نہیں کیا گیاہے۔ محکمہ کے اعلیٰ افسران کی طرف سے چک ڈیم پر ریلنگ نصب کرنے کا حکم جاری ہونے کے بعد بھی متعلقہ افسران توجہ نہیں دے رہے ہیں۔ لہٰذا محکمہ کے افسران کو فوری طورپر کام شروع کرنےکی ہدایت دی جائے 

اسی طرح انہوں نے ایک دوسرے میمورنڈم میں مانگ کی ہےکہ سرابی ندی کے تمام علاقوں میں پچنگ کی جائے تاکہ بارش کے موسم میں ندی کا پانی ابل کر اطراف کے علاقوں میں نہ گھس سکے۔

فیاض ملا نے بتایاکہ تعلقہ کے کدرے بیرپا مندر سے منڈلی کے گرڈیکر دامو کے گھر تک یعنی سرابی ندی کے غیر مسلم علاقوں میں  کروڑوں روپئے کی لاگت سے سرابی ندی کے کنارے پچنگ کا کام جاری ہے۔ لیکن مسلم علاقوں میں یہ کام نہیں ہورہا ہے۔ انہوں نے بتایا کہ پچنگ کا کام اگر صرف مخصوص علاقوں میں ہوگا اور بقیہ علاقوں میں نہیں ہوگا تو پورےبھٹکل شہر کے لئے خطرہ لاحق ہوسکتاہے۔ کیونکہ بارش کے موسم میں پانی جب ایک علاقہ کی پچنگ سےٹکرائےگاتو ظاہر ہے دوسرے علاقہ میں پچنگ نہ  ہونے سے غوثیہ اسٹریٹ، شاذلی اسٹریٹ اور مشما اسٹریٹ میں پانی میں بہت زیادہ دباو اور جوش پیدا ہوگا جس کے نتیجے میں مسلم علاقے زیر آب ہونےکا خطرہ ہے۔انہوں نے حکام سے درخواست کی ہے کہ عملی طور پر نقشہ کا سائنٹیفک طور پر جائزہ لے اور جن علاقوں میں پچنگ کا کام منظور نہیں کیا گیا ہے، ان علاقوں میں بھی پچنگ تعمیر کرنے کا حکم دیا جائے۔

سماجی کارکن فیاض ملانے بتایا کہ دونوں کاموں کی انجام دہی کے لئے اس سے قبل بھی انہوں نے متعلقہ حکام کومیمورنڈم پیش کرتے ہوئے ان کی توجہ اس طرف مبذول کرائی تھی مگر محکمہ جات کی طرف سے کوئی مناسب کارروائی نہ ہونےکی وجہ سے دوبارہ میمورنڈم دیتےہوئے متوجہ کرنےکی کوشش کی ہے۔ فیاض ملا نے بتایا کہ ڈپٹی کمشنر کی طرف سے بھٹکل اسسٹنٹ کمشنر کو ہدایت دی گئی ہے کہ اس طرف توجہ دی جائے، دوسری طرف بھٹکل اسسٹنٹ کمشنر ممتا دیوی نے انہیں بتایا ہے کہ وہ اس تعلق سے متعلقہ مقام کا دورہ کرکے جائزہ لے گی جس کے بعد وہ مناسب اقدامات کریں گی۔