دبئی  21؍مئی (ایس او نیوز) بھٹکل سے تعلق رکھنے والی فاطمہ محتشم اور عائشہ محتشم نے دبئی  میں منعقدہ ۱۲ واں قرآن مقابلہ جیت کر ہندوستان اور بالخصوص بھٹکل کے مسلمانوں کے لئے قابل رشک کارنامہ انجام دیا ہے۔ خیال رہے کہ کچھ سال قبل ان کی والدہ فائزہ  صدیق محتشم جو قران کی حافظہ ہیں ، نے بھی اسی طرح کا قران کا ایک مقابلہ جیت کر پورے ملک کا نام  روشن کردیا تھا۔

محمد بن راشد سنٹر فار کلچرل اینڈ سوشیل انڈاسٹانڈنگ کے زیراہتمام منعقدہ اس مقابلۂ قرآن میں غیر عرب شرکاء کی بہت ہی قلیل تعداد تھی جس میں بھٹکل کی محتشم بہنیں بھی شامل تھیں۔دبئی سے ملنے والی رپورٹ کے مطابق اس مقابلے کے ایک زمرے میں مختلف ممالک سے تعلق رکھنے والے درجنوں شرکاء کو شکست دے کر فاطمہ محتشم نے اول مقام حاصل کیا تو اس کی بہن عائشہ محتشم نے دوسرا مقام اپنے نام کرلیا۔

 محتشم بہنوں کو  شیخ سعید بن حشر المختوم کے ہاتھوں دبئی  انٹرنیشنل ہولی قرآن ایوارڈ کے ہیڈکوارٹرز میں انعام و اعزاز سے نوازا گیا۔جناب جان صدیق محتشم نے اپنی دُختران  کے بارے میں بتایا کہ بڑی بہن فاطمہ(۱۵سال) نے بارہ سال کی عمر میں حفظ قرآن مکمل کرلیا تھا، جبکہ چھوٹی بہن عائشہ(۱۱سال) نے ابھی پانچ پارے حفظ کیے ہیں۔ آگے بتایا کہ ان دونوں کو اس مقابلے کے لئے ان کی والدہ نے ہی تیار کیا تھا اور قران حفظ کرانے کے پیچھے بھی ان کی والدہ کا ہی رول رہا ہے، البتہ  دونوں نے سند کے لئے مرکز  النور میں داخلہ لیا تھا۔

جان صدیق نے بتایا کہ فاطمہ نے اس سے پہلے بھی بہت سے مقابلے جیتے ہیں۔ مگر اب کی بار اس نے ڈھائی پاروں پر مشتمل قرآن کی سب سے طویل سورۃ البقرہ حفظ کرنے کے زمرے میں اول مقام پایا ہے۔فاطمہ اس وقت 10ویں گریڈ کی اسکولی طالبہ ہے۔ جبکہ عائشہ  پانچویں کلاس میں زیرتعلیم ہے، یہ دونوں دبئی کے سینٹرل اسکول کی طالبات ہیں۔جان  صدیق کے مطابق  دونوں بہنیں فاطمہ اور عائشہ عربی زبان کی پوری جانکاری رکھتی ہیں اور اپنی مادری زبان نوائطی  سے زیادہ بہتر انداز میں عربی بولتی ہیں۔

ساحل آن لائن سے فون پر گفتگو کرتے ہوئے فاطمہ نے اس انعام کے لئے اللہ کا شکر اداکیاکہ اسی کی توفیق سے یہ مقام نصیب ہواہے۔ اس کے علاوہ اس نے اپنی والدہ اور اپنے اساتذہ  کا بھی شکراداکیااور کہا کہ قرآن کتاب ہدایت ہے، جو محمد ﷺ پر اتاری گئی اور یہ صرف مسلمانوں کے لئے نہیں بلکہ عالم انسانیت کے لئے ہے۔

بتایا گیا ہے کہ ہر سال منعقد ہونے والے اس مقابلۂ قرآن میں ۵۰۰ سے زیادہ لڑکے اور لڑکیاں شامل ہوتے ہیں۔حفظ کی سطح اور قرآت کے انداز و معیار پر مشتمل کُل ۳۴ زمروں میں تقسیم یہ مقابلہ مارچ اور اپریل کے درمیان منعقد ہوتا ہے۔

دونوں بہنوں کی اس شاندار کامیابی پر مجلس اصلاح و تنظیم بھٹکل کے جنرل سکریٹری جناب محی الدین الطاف کھروری نے دونوں طالبات کے ساتھ ساتھ ان کے والدین کو بھی مبارکباد پیش کی ہے، اسی کے ساتھ ساتھ دبئی میں موجود بھٹکل کے ذمہ داران بالخصوص قائد قوم جناب ایس ایم سید خلیل الرحمن، محمد اشفاق سعدا اور محمد یوسف برماور نے بھی ان کی خدمت میں ہدیہ تبریک پیش کرتے ہوئے نیک خواہشات کا اظہار کیا ہے۔

ادارہ ساحل آن لائن بھی جناب صدیق محتشم جان اور ان کی دونوں دُختران کو مبارکباد پیش کرتا ہے اور دُعا گو ہے کہ اللہ دونوں بچیوں کو نظر بد سے محفوظ رکھے اور اگلے میدانوں میں بھی کامیابی اور کامرانی ان کے قدم چومے۔