بھٹکل شرالی میں ہوئی چوری کے معاملے میں بنٹوال سے ایک شخص گرفتار؛ مزید ایک مقامی چور کی پولس کو تلاش
بھٹکل :27/جولائی (ایس اؤ نیوز) بھٹکل تعلقہ کے شرالی چتراپور میں 24 جولائی کو پیش آئی چوری کی واردات کے الزام میں پولس نے ایک شخص کو بنٹوال میں گرفتار کرلیا ہے جس کی شناخت منگلور تعلقہ کلمنڈکور دیہات کے مکین اُماناتھ پربھو (51) کی حیثیت سے کی گئی ہے۔ پولس ذرائع سے ملی اطلاع کے مطابق اس کے پاس سے چار لاکھ روپئے مالیت کے زیورات اور 52 ہزار روپئے نقد بھی برآمد کرلی گئی ہے ۔
ذرائع کے مطابق بنٹوال ریلوے اسٹیشن کے قریب ایک شخص مشکوک حالت میں گھوم رہا تھا، مصدقہ خبر پر کارروائی کرتے ہوئے بنٹوال پولس جائے وقوع پر پہنچی تو متعلقہ شخص گھبرا گیا اور فرار ہونے کی کوشش کی۔ جب پولس نے ملزم کو اپنی تحویل میں لے کر پوچھ تاچھ کی تو شروع میں نام اور مقام کے متعلق صحیح جواب دئیے بغیر ٹال مٹول کرنے لگا، ہاتھ میں موجود بیاگ کھول کر دیکھا گیاتوتھیلی میں سونے ، چاندی کے زیورات اور 52،390 روپئے نقد پائے گئے ، جب زیورات اور نقد رقم کے متعلق پوچھنے پرمعقول جواب نہیں ملاتو پولس نے ملزم کو گرفتار کرلیا اور تھانہ لے جاکر سختی کے ساتھ پوچھ تاچھ کی جس کے بعد ملزم نے بھٹکل تعلقہ شرالی کے ایک گھر سے چوری کرنےکی بات قبول کی۔
خیال رہے کہ معاملے کو لے کر بھٹکل مضافاتی پولس تھانے میں معاملہ درج ہوا تھا۔
خیال رہے کہ 24جولائی کو شرالی کے چتراپور کے ایک گھر میں رات کو جب گھرمیں کوئی موجود نہیں تھا تو چوروں نے دروازہ توڑ کر اندر داخل ہوتے ہوئے الماریوں میں رکھے ہوئے زیورات پر ہاتھ صاف کرلیا تھا۔
پولس ذرائع نے خبر دی ہے کہ پوچھ تاچھ کے دوران اس بات کی بھی جانکاری ملی ہے کہ چوری کی اس واردات میں بھٹکل کے ایک مقامی شخص کا بھی ہاتھ ہے، جس کو پولس اب تلاش کررہی ہے۔
