بھٹکل ٨ جون (ایس او نیوز) عالمی یوم ماحولیات کے موقع پر5 جون کو بھٹکل کے کئی نجی اور سرکاری اسکولوں میں خصوصی پروگرام منعقد کئے گئے، اسی طرح کا ایک انوکھا اور منفرد پروگرام معروف انگریزی میڈیم  اسکول، نیو شمس اسکول کے  کیمپس  میں بھی  منعقد کیا گیا، پہلے تو اسکول کیمپس میں شجرکاری کی گئی، جس کے دوران مہمان خصوصی کے طور پر تشریف فرما ماہر ماحولیات کے ذریعے طلبہ میں بیداری پیدا کرنے کی کوشش کی گئی۔ جبکہ اسکول کے اطراف موجود پانچ بڑی مساجد میں طلبہ کی ایک ٹیم کے ذریعے نمازادا کرنے کے لئے پہنچے لوگوں میں یوم عالمی ماحولیات کی مناسبت سے آگاہی پیدا کرنے کی کوشش کی گئی۔ ماحول کو بہتربنانے اوراسے آلودہ ہونے سے بچانے کے لئے شجرکاری اور درختوں کی دیکھ بھال کتنی ضروری ہے، اس طرف نمازیوں کی توجہ دلائی گئی اس موقع پر اسکول کے دائر کار میں آنے والی منیری مسجد، فردوس مسجد اور فاطمہ مسجد میں نماز کے لئے آئے ہوئے تقریباً 60 لوگوں میں مختلف پودے تقسیم کیے گئے اور اپنے اپنے گھروں کے احاطے میں اس کی شجرکاری کی ترغیب دی گئی۔

شمس اسکول کی طرف سے یوم ماحولیات کے موقع پر طلبہ کوسرکاری دفاترمیں بھی لےجایا گیا اور بالخصوص بھٹکل بلاک ایجوکیشن آفس، ٹاون پولس اسٹیشن اور اسسٹنٹ کمشنر دفتر پہنچ کرآفسران کو سجاوٹی پودے بطورعطیہ پیش کئے گئے۔

اسکول کیمپس میں شجرکاری کےبعد مہمان خصوصی عبدالواحد خطیب نے خطاب  کرتے ہوئے کہا کہ پودوں کے لئے جس طرح پانی، کھاد اور کیڑے  مار ادویات ضروری ہیں، اُس سے کہیں زیادہ انسانوں کی توجہ ضروری ہے۔ انہوں نے کہا کہ درخت ماحول کے توازن کو برقرار رکھنے میں بہت اہم کردار ادا کرتے ہیں اورتعلیم گاہوں کے اطراف  درخت لگانے سے یہ پڑھائی کے ماحول کو بہتر اور صحت مند بنانے میں معاون ثابت ہوسکتے ہیں۔انہوں نے طلبہ  کو مشورہ دیا کہ وہ درختوں کوزیادہ سے زیادہ اُگانے کی طرف توجہ دیں اور درختوں کی دیکھ ریکھ  کرتے ہوئے درختوں سے محبت کریں۔

اس موقع پرپروگرام کو منظم کرنے میں پیش پیش اسکول  ٹیچر ایم آرمانوی سمیت پرنسپل لیاقت علی،  اسکول کے  بانی  و رکن ڈاکٹر خواجہ اویس رکن الدین، نائب صدر سید قطب برماور ندوی، سکریٹری انعم اعلیٰ ایم ٹی۔ اساتذہ سبحان ندوی، عبداللہ خلیفہ، منجوناتھ ہیبار، طلباء میں محمد غطریف ردا، احمد دامدا، محمد یوشا صدیقہ، حنظلہ، حبیب موٹیا، محمد افہم محتشم، محمد ذیان بنگالی،  سید صابق برماور، محمد لبید ودیگر موجود تھے۔