بھٹکل،18؍اگست (ایس او نیوز) سوشیل ڈیموکریٹک پارٹی آ ف انڈیاشمالی کینرا یونٹ نے بھٹکل تحصیلدار کے توسط سے وزیر اعلیٰ کرناٹکا ایڈی یورپا کے نام ایک میمورنڈم دیتے ہوئے مطالبہ کیا کہ سرکاری اسکولوں میں باورچی اور معاون کی خدمات انجام دینے والو ں کی جواعزازی تنخواہ گزشتہ پانچ مہینوں سے بقایا ہے اس کو فوراً ادا کردیا جائے۔

میمورنڈم میں کہا گیا ہے کہ ’اکشر داھا‘ منصوبے کے تحت 54ہزار اسکولوں میں 1.78لاکھ افراد باورچی اور معاون بارچی کی خدمات انجام دے رہے ہیں۔اور حکومت کی طرف سے جو اعزازی مشاہرہ انہیں دیا جاتا ہے وہ گزشتہ پانچ مہینوں سے ادا نہیں کیا گیا ہے۔یہ ایک افسوسناک بات ہے۔ اس وقت لاک ڈاؤن کی وجہ سے ان لوگوں کو دوسری نوکریاں بھی نہیں مل رہی ہیں۔اس لئے یہ لوگ انتہائی مشکلات کا سامنا کررہے ہیں۔لہٰذاسرکار کی طرف سے ان لوگوں کی محنت کا پھل انہیں فوری طور پر دیا جانا چاہیے۔اور پانچ مہینوں کی بقایا رقم ادائیگی کے لئے فوری طور جاری کردینا چاہیے۔