بھٹکل 13 اگست (ایس اونیوز) بھٹکل مخدوم کالونی کا ایک نوجوان اُڈپی کے اُدیاور میں سڑک حادثہ میں شدید زخمی ہوا ہے اور اسے منی پال کستوربا اسپتال شفٹ کیا گیا ہے، نوجوان کی مالی حالت کمزور ہونے کی وجہ سے علاج کے لئے قریب تین لاکھ روپیوں کی فوری ضرورت ہے۔ نوجوان کی شناخت سمیرسوکیری (34) کی حیثیت سے کی گئی ہے۔ پتہ چلا ہے کہ حادثہ 31 جولائی کو ہوا تھا۔
اُڈپی کے سماجی کارکن حُسین کوڈی بینگرے نے بتایا کہ نوجوان اُدیاور کے ایک ہوٹل میں کام کرتا تھا، سموسہ کی ڈیلوری کے دوران جب وہ سڑک کنارے اپنی بائک کے ساتھ کھڑا تھا تو ایک تیز رفتار کار اس سے ٹکراگئی۔ حادثہ میں سمیر شدید زخمی ہوا تھا، ابتدائی طبی امداد کے بعد اسے منی پال شفٹ کیا گیا۔ حُسین نے بتایا کہ نوجوان کی حالت سدھر رہی ہے مگر اس کے پیر بری طرح فریکچر ہوئے ہیں اور اس کے علاج کے لئے کم ازکم تین لاکھ روپیوں کی ضرورت ہے۔
مخدوم کالونی کے ایک ذمہ دار نے بتایا کہ سمیر کی مالی حالت ایسی نہیں ہے کہ وہ اسپتال کا خرچ برداشت کرسکے، اس بنا پر اگر کوئی صاحب خیر حضرات اس کی مدد کریں تو اس کا فوری علاج ممکن ہے۔ پتہ چلا ہے کہ شادی شدہ سمیر کو دو چھوٹے بچے ہیں۔ اپنا اور اپنے بیوی بچوں کا پیٹ پالنے کے لئے وہ اُدیاور میں ڈیلیوری کا کام کرتا تھا، جس کے دوران یہ حادثہ پیش آیا۔ پتہ چلا ہے کہ اُدیاور پولس نے اُسی وقت کار کو اپنی تحویل میں لیتے ہوئے معاملہ درج کیا ہے۔
اگر کوئی سمیر کی مالی مدد کرنا چاہے یا منی پال اسپتال پہنچ کرسمیر کی تیمارداری کرنا چاہے تو اسپتال میں سمیر کے بھائی غفران سے موبائل نمبر 7848020162 پر رابطہ کرسکتے ہیں ، بھٹکل میں اس نوجوان کی کوئی مالی طور پر مدد کرنا چاہتے ہوں تو ساحل آن لائن کے نمائندے مبشر ہلارے سے موبائل نمبر 9972818849 پر رابطہ کرسکتے ہیں۔