بھٹکل :10؍فروری(ایس اؤ نیوز)شہر کے ساگر روڈ پرمحکمہ فوریسٹ سے زمین حاصل کرکے تعمیر کئے جارہے کچرانکاسی مرکز کی نگرانی ٹھیک طرح سے نہ ہونے اور غلیظ پانی اور بدبو سے اطراف کے دیہی عوام کی صحت متاثر ہونے کا الزام عائد کرتے ہوئے برہم عوام نے کچرانکاسی مرکز کے سامنے پیر کو احتجاج کیا۔
احتجاجیوں نے بتایا کہ بھٹکل شہر کا پورا کچرا یہاں لاکر جمع کیا جاتاہے، لیکن اس کی ڈھنگ سے نہ نگرانی ہوتی ہے اور نہ ہی پیشگی اقدامات کئے جاتے ہیں۔ مرکز کے گڑھےمیں کچے کچرے کا غلیظ پانی باہر نکل کر کھیتوں میں گھس رہا ہے۔ جس کے نتیجے میں کنوئیں گدلے ہورہے ہیں ، سوکھا کچرا اور قصائی خانے کا کچرا علاحیدہ نہ کرنے کی وجہ سے اطراف میں بدبو پھیل رہی ہے۔ جس سے وہاں رہنا دوبھر ہوگیا ہے۔ احتجاجیوں کے مطابق متعلقہ علاقہ میں کچرہ مرکز قائم کرنے سے ایک نہیں بلکہ کئی مسائل پیدا ہورہے ہیں۔ کمپاؤنڈ کی دیوار بھی ٹھیک نہ ہونے سے آوارہ کتے ، جنگلی سور سمیت کئی چرند پرند سے بھی پریشانی ہورہی ہے۔ انہوں نے کہا کہ ایسے خستہ حال کچرا نکاسی مرکز کو درمیان میں لے کر ہم لوگوں کا جینا دوبھر ہوگیا ہے۔ احتجاجیوں کا کہنا ہے کہ ان مسائل کو لے کر میونسپالٹی افسران ، ڈپٹی کمشنر یہاں تک کے آلودگی انسداد بورڈ تک توجہ دلائی گئی مگر کوئی حل نہیں نکلا۔ ان کے مطابق 2015کو کچرانکاسی کی مدت ختم ہورہی ہے، ہم اب کسی بھی حال میں یہ مرکز یہاں رہنے نہیں دیں گے اس کو لازماً منتقل کرنے کا مطالبہ کرتے ہوئے احتجاجیوں نے متعلقہ جگہ سے نہ ہٹنے کی ضد پر اڑ گئے۔ جس کی وجہ سے کچھ دیر کے لئے حالات کشیدہ ہوگئے۔ اس کے تھوڑی دیر بعد رکن اسمبلی سنیل نائک ، بھٹکل اسسٹنٹ کمشنر ساجد ملا ، ڈی وائی ایس پی گوتم، تحصیلدار وی پی کوٹرولی ، میونسپالٹی چیف آفیسر دیوراج جائے وقوع پر پہنچ کر احتجاجیوں کی شکایات کو سماعت کیا۔
چیف آفیسر دیوراج نے بتایا کہ کچرا نکاسی مرکز کے سدھار کے لئے کئی اقدامات کئے جارہے ہیں، ’سانیٹری فٹ ‘کی نصب کاری کے لئے ٹینڈر بلایاگیا ہے، انہوں نے یقین دلایا کہ یہ تمام کام ختم ہونے کے بعد مسائل حل ہوجائیں گے۔ مگر اس درمیان رکن اسمبلی سنیل نائک نے ان کی بات کو ماننے سے انکار کرتے ہوئے اگلے ایک ہفتہ کے اندر پوری طرح سے مسئلہ کو حل کرنے کے لئے کارروائی کرنے کا حکم دیا جس کے بعد چیف آفیسر نے ایک ہفتہ میں کام ختم کرنے کی حامی بھری ۔ جٹپا نائک، آنند نائک، شری دھر دیواڑیگا، راجیش گلمی ، ماستپا نائک، ڈیاویا نائک، سومیا گونڈ، کرشنا نائک، شریف بیاری ، مہیش دیواڑیگا، ناگما ، منجوناتھ نائک، دیوما دیواڑیگا وغیرہ موجود تھے۔