بھٹکل میں رجسٹرڈ مزدوروں کو نہیں مل رہی ہے سرکاری امداد : عرضیاں نمٹانے میں افسران پر غفلت برتنے کا الزام
بھٹکل:10؍جنوری (ایس اؤ نیوز) مزدوروں کی طرف سے مختلف منصوبہ جات کے تحت معاشی امداد کے لئے عرضیاں داخل کرکے ایک مدت گزرنےکے بعد بھی عرضیوں پر کاروائی نہیں ہونے کا الزام سامنے آیا ہے، مزدوروں کی مانیں تو تعلقہ کے مزدوروں کی طرف سے داخل کی گئیں ہزاروں عرضیوں پر سرکاری حکام کسی بھی طرح کی کوئی کاروائی نہیں کررہے ہیں اور مزدور ہاتھ پر ہاتھ رکھے جواب موصول ہونے کے منتظر ہیں۔
پتہ چلا ہے کہ بھٹکل تعلقہ میں قریب 11ہزار رجسٹرڈ مزدور ہیں۔ مزدوروں کی طرف سے’سیوا سندھو ‘ ویب سائٹ کے ذریعے داخل کردہ عرضیوں کو سکال منصوبے کے تحت متعینہ وقت میں نمٹانا ہوتاہے۔ لیکن تعلقہ کے مزدور اپنے یومیہ کاموں کو چھوڑ کر عرضی کے متعلق جانکاری لینے دفتر کے چکر لگانے پر مجبور ہیں۔
عملہ کی قلت:ہرمہینہ مزدور کارڈ کی تجدیدکاری سمیت نئے کارڈوں کےلئے بھی عرضیاں داخل کی جاتی ہیں۔ اس کے علاوہ کئی معاشی امداد کی عرضیاں بھی رہتی ہیں، عرضیوں کی دیکھ ریکھ کے بعد کام پورا کرنے کے لئے ضروری ہے کہ افسران جائے وقوع کا معائنہ کرنے کے بعد مصدقہ مزدور کی نشاندہی کرے، جس کے بعد ہی اُن کی تصدیق کرنا ہوتاہے۔تعلقہ میں پورے کاموں کو حل کرنے کے لئے کوئی بااختیار افسر نہیں ہے، سرکاری حکام سے پوچھے جانے پر جواب ملا ہے کہ ضلع کے دوتعلقہ جات کی ذمہ داری سنبھالنے والے افسر بھٹکل میں ہفتہ کے تین دن ہی موجود رہتے ہیں جس میں دو خاتون عملہ ہے، متعلقہ سرکاری حکام کے مطابق ہزاروں عرضیوں کی جانچ کے بعد ان کی تصدیق کرنے میں دیری ہورہی ہے۔
لاک ڈاؤن کے دوران ریاستی حکومت کی طرف سے اعلان کردہ 5ہزارروپیوں کی امداد ی رقم آدھے سے زیادہ مستفیدین کو نہیں ملی ہے۔ تعلیمی وظائف ، شادی امداد ، ہیلتھ انشورنس جیسے منصوبہ جات کے لئے عرضیاں داخل کرکے برسوں گزر گئے لیکن ابھی تک کوئی امدادی رقم موصول نہیں ہوئی ہے۔ بیچارے مزدور ادھر ادھر گھوم گھام کر دستاویزات کو جمع کرکے عرضیاں داخل کرتے ہیں لیکن اُنہیں کوئی ریسپانس نہیں مل رہا ہے، کہا جارہا ہے کہ افسران چھوٹی موٹی وجوہات بتاکر عرضیوں کو مسترد کررہے ہیں، جس پر مزدوروں میں کافی ناراضگی پائی جارہی ہے۔
ایجنٹوں کی شرارت : مصدقہ مزدوروں کو مزدور کارڈ دینے کےلئے محکمہ مزدور نے کئی سارے رہنما خطوط تشکیل دئیے ہیں، مگر ہو یہ رہاہے کہ جو مصدقہ مزدور نہیں ہیں ایجنٹ اپنی چالاکیوں سے انہیں مزدور کارڈ فراہم کررہے ہیں ۔مزدوروں نے بتایا کہ آن لائن داخل کردہ عرضیوں کو نمٹانے کےلئے مہینوں وقت درکار ہوتا ہے، مگر جو عرضی دلال لے کر جاتے ہیں اُن عرضیوں کی ایک ہی دن میں تصدیق ہوجاتی ہے۔
اس سلسلے میں محکمہ مزدور کے افسر گرونائک کا کہنا ہے کہ بھٹکل میں کل 11ہزار رجسٹرڈ مزدور ہیں، کوویڈ کے بعد رجسٹریشن کے لئے 3ہزار عرضیاں داخل کی گئی ہیں۔ پرانے 2500عرضیوں کی جانچ کرنےکے بعد نمٹانے لے کر آیاہوں، بقیہ 1500 عرضیاں باقی ہیں۔ انا عرضیوں پر بھی بہت جلد کاروائی کی جائے گی۔
